बीपी प्रतिष्ठानकी नवनियुक्त उपकुलपति प्रा.डा. स्मृति कार्कीद्वारा पदभार ग्रहण

धरान । बीपी कोइराला स्वास्थ्य विज्ञान प्रतिष्ठानकी नवनियुक्त उपकुलपति प्रा.डा. स्मृति कार्कीले सोमबार प्रतिष्ठान पुगेर औपचारिक रूपमा पदभार ग्रहण गर्नुभएको छ।

प्रधानमन्त्री तथा प्रतिष्ठानका कुलपति बालेन्द्र शाहले गत असार २४ गते रिक्त रहेका विभिन्न स्वास्थ्य विज्ञान प्रतिष्ठानका उपकुलपतिहरू नियुक्त गर्ने क्रममा प्रा.डा. कार्कीलाई बीपी कोइराला स्वास्थ्य विज्ञान प्रतिष्ठानको उपकुलपतिमा नियुक्त गर्नुभएको थियो।

प्रा.डा. कार्की यसअघि प्रतिष्ठानको प्याथोलोजी विभाग प्रमुखका रूपमा कार्यरत हुनुहुन्थ्यो। उहाँले यही प्रतिष्ठानबाट प्याथोलोजी विषयमा स्नातकोत्तर (एमडी) अध्ययन पूरा गर्नुभएको हो। साथै, उहाँ प्रतिष्ठानको कार्यकारिणी समिति सदस्यका रूपमा समेत जिम्मेवारी निर्वाह गरिसक्नुभएको छ।

उहाँको पदभार ग्रहण कार्यक्रममा निमित्त कार्यालय प्रमुख तथा डेपुटी अस्पताल निर्देशक डा. इन्द्र लिम्बू, डीन, सहायक अस्पताल निर्देशकहरू, प्रवक्ता तथा सहप्रवक्ताहरू, प्रतिष्ठानअन्तर्गतका विद्यालय तथा कलेजका प्रमुखहरू, विभागीय प्रमुखहरू, मेट्रोनहरू तथा अन्य पदाधिकारीहरूको उपस्थिति रहेको थियो।

यसअघि सरकारले गत वैशाख १९ गते विभिन्न सरकारी संस्था, विश्वविद्यालय तथा प्रतिष्ठानका पदाधिकारीहरूलाई पदमुक्त गर्ने व्यवस्था सहित अध्यादेश जारी गरेपछि तत्कालीन उपकुलपति प्रा.डा. विक्रमप्रसाद श्रेष्ठ, शिक्षाध्यक्ष प्रा.डा. सञ्जीवकुमार शर्मा, रजिष्ट्रार प्रा.डा. सूर्यप्रसाद सङ्ग्रौला तथा अस्पताल निर्देशक डा. जगतनारायण प्रसाद पदमुक्त हुनुभएको थियो।

त्यसपछि उपकुलपति पदका लागि आवेदन आह्वान गरिएको थियो। उक्त प्रतिस्पर्धामा १६ जना चिकित्सक तथा प्राध्यापक सहभागी भएका थिए। छनोट प्रक्रियाको विभिन्न चरण पार गर्दै अन्तिम रूपमा प्रा.डा. स्मृति कार्की उपकुलपतिमा नियुक्त हुन सफल हुनुभएको हो।

उपकुलपतिको नियुक्ति प्रक्रिया सम्पन्न नहुँदासम्म प्रतिष्ठानको प्रशासनिक तथा आर्थिक गतिविधिलाई निरन्तरता दिन सरकारले डेपुटी अस्पताल निर्देशक डा. इन्द्र लिम्बूलाई सम्पूर्ण आर्थिक तथा प्रशासनिक अधिकारसहित निमित्त कार्यालय प्रमुखको जिम्मेवारी दिएको थियो।