नेपालमा पहिलो पटक उत्पादित क्यान्सरको औषधि बजारमा

नेपालकै पहिलो उत्पादन क्यान्सरको औषधि बजारमा आएको छ । टिजिग फार्मा प्रालिबाट उत्पादित  एन्टिक्यान्सर ड्रगको विक्री सुरु भएको हो । 

टिजिग फार्मा क्यान्सर रोगविरुद्धको औषधि उत्पादन गर्ने नेपालकै पहिलो कम्पनी बनेको छ। टिजिगका कार्यकारी निर्देशक शैलेश वैद्यका अनुसार अहिले नेपाल भित्रै बिक्री बितरण गर्न विभागबाट तीनवटा मोलिक्यूलको मार्केट लाइसेन्स प्राप्त भइसकेको छ । औषधि विदेशी बजारमा समेत पठाउने वैद्यले  बताउनुभयो । 

कम्पनीको उत्पादन विश्वस्तरकै रहेकाले विदेश निर्यात् हुने दावी उहाँको छ । अहिले उत्पादन गरिएका एन्टीक्यान्सर औषधि ट्याब्लेट र क्याप्सुल रहेको कार्यकारी निर्देशक वैद्यले जानकारी दिनुभयो । इन्जेक्सनमा आधारित औषधि पनि निकट भविष्यमै बनाउने योजना रहेको उहाँले बताउनुभयो । 

‘अहिले हामी मुखबाट खान मिल्ने औषधि ट्यावलेट र क्याप्सुल बनोटमा पठाएका छौं । हामी यति मै खुम्चिने होइन । इन्जेक्सन स्वरुपमा पनि जानेछौं, वैद्यले भन्नुभयो ।

एन्टिक्यान्सर औषधिको मूल्य आयातित औषधिको तुलनामा केही सस्तो हुने पनि वैद्यले  बताउनुभयो ।