किन खुवाइदैंछ अफगानिस्तानबाट फर्किएकालाई पोलियो थोापा ?

नेपाल सरकारले अफगानिस्तानबाट उद्धार गरेर ल्याएएका नेपालीहरुलाई पोलियो थोपा खुवाउदैंछ ।

विश्व स्वास्थ्य संगठन अन्तर्गतको आइएचआर (इन्टरनेशनल हेल्थ रेगुलसन)को सिफारिसपछि अफगानिस्तानबाट फर्किएका नेपालीहरुलाई पोलियो थोपा खुवाउन लागिएको हो । हालसम्म अफगानिस्तानबाट ५ सय ४ जना नागरिकको सरकारले उद्धार गरिसकेको छ ।

अफगानिस्तान पोलियो जोखिमयुक्त क्षेत्र भएकाले त्यहाँबाट ल्याइएको सबै नेपालीलाई आजैदेखि पोलियो खोप खुवाउन लागिएको स्वास्थ्य सेवा विभाग अन्तर्गतको बाल स्वास्थ्य तथा प्रमुख डा झलक शर्मा गौतमले जानकारी दिनुभयो । आज १५० जना नेपाली उद्धार गरि ल्याइएको र उनीहरुलाई अहिले केहीबेरमा विमानस्थलमा नै पोलियो थोपा खुवाइने उहाँले बताउनुभयो । 

यसअघि अफगानिस्तानबाट आएकाहरुलाई जिल्ला- जिल्लाका खोपकेन्द्रबाट पोलियो थोपा खुवाउने व्यवस्था मिलाइने उहाँले बताउनुभयो । ‘अफगानिस्तान अझै पनि पोलियोको उच्च जोखिमयुक्त क्षेत्र हो, त्यसैले हामीले त्यहाँबाट आएकाहरुलाई पोलियो थोपा खुवाउन लागेका हौं,’ उहाँले भन्नुभयो ।

हाल नेपालमा ५ वर्ष मुनिका बालबालिकालाई मात्रै पोलियो थोपा खुवाइदै आएको छ तर अहिले अफगानिस्तानबाट आएकाहरुको हकमा भने उमेरको हदबन्दी कायम नभएको गौतमले बताउनुभयो । सन् २०१६ यता अफगानिस्तान र पाकिस्तानमा मात्र पोलियो रोग छ ।