भारतमा 'सिरप' औषधि प्रयोगबाट बालबालिकाको मृत्य भएको खबरपछि डीडीएले जारी गर्‍यो पाँच वर्गलाई यस्तो निर्देशन

भारतका विभिन्न राज्यहरूमा ‘Coldrif Cough Syrup’ औषधिको सेवनपछि बालबालिकाको मृत्यु भएको खबर सार्वजनिक भएपछि नेपालमा समेत उक्त औषधिको प्रयोग र सुरक्षा सम्बन्धी चेतावनी जारी गरिएको छ ।

स्वास्थ्य तथा जनसंख्या मन्त्रालयअन्तर्गतको औषधि व्यवस्था विभाग (डीडीए)ले मंगलबार एक सूचना जारी गर्दै भारतको Sresan Pharma, India कम्पनीले उत्पादन गरेको Coldrif Cough Syrup नेपालमा आयात वा प्रयोग नगर्न आग्रह गरेको छ। विभागले सो औषधि नेपालमा दर्ता नभएको र यसका उत्पादन तथा सोसँग सम्बन्धित अन्य औषधिहरूको विवरण विभागमा दर्ता नभएको भन्दै सावधानी अपनाउन आग्रह गरेको हो।

विभागका अनुसार Coldrif Cough Syrup लगायतका औषधिमा Ethylene Glycol र Diethylene Glycol नामक विषालु रसायन मिसिएको आशंका गरिएको छ, जसको सेवनले गम्भीर स्वास्थ्य समस्या र मृत्यु हुन सक्ने जोखिम रहन्छ।

विभागले औषधिसँग सम्बन्धित पाँच वर्ग– उत्पादक, आयातकर्ता, फार्मेसी, चिकत्सक तथा आम सर्वसाधारणलाई निर्देशन जारी गरेको हो । 

औषधि उत्पादकका लागि
- केवल विभागद्वारा स्वीकृत आपूर्तिकर्ताबाट मात्र कच्चा पदार्थ किन्ने।

- औषधि उत्पादनमा प्रयोग हुने Propylene Glycol, Polyethylene Glycol, Sorbitol आदि पदार्थमा Ethylene Glycol वा Diethylene Glycol मिसावट छैन भन्ने सुनिश्चित गरी मात्र उत्पादन र बिक्री गर्नुपर्ने।

औषधि आयातकर्ताका लागि
- नेपाल भित्रिने औषधि तथा कच्चा पदार्थमा Ethylene Glycol र Diethylene Glycol को परीक्षण गरी मात्र आयात र वितरण गर्नुपर्ने।

फार्मेसी सञ्चालकका लागि
- विभागमा दर्ता भएका औषधिहरू मात्र बिक्री वितरण गर्नुपर्ने।

चिकित्सकका लागि
- विभागमा दर्ता भएका औषधिहरू मात्र प्रेसक्राइब गर्नुपर्ने।
- अज्ञात वा असुरक्षित स्रोतका खोकीका औषधिहरू प्रयोग नगर्न र बालबालिकामा सेवन गराउन नहुने।

सर्वसाधारणका लागि
- बालबालिकाका लागि कुनै पनि अनियमित वा अनधिकृत खोकी सिरप प्रयोग गर्न नहुने ।
- औषधि खरिद गर्दा विभागमा दर्ता भएको ब्रान्ड मात्र प्रयोग गर्नुपर्ने ।