विद्यार्थीबाट अग्रिम करोडौँ उठाउने नेपाल मेडिकल कलेजको दाउ
चिकित्सा शिक्षा स्नातक तहको नयाँ शैक्षिक सत्र सुरु हुनै लागेको छ । मेडिकल कलेजहरुमा अहिले विद्यार्थी भर्ना प्रक्रिया चलिरहेको छ।
विद्यार्थीसँग अशुल्ने मौका कुरेर बसेका मेडिकल कलेजहरु अनेक शीर्षकमा नियमविपरीत शुल्क असुल्ने तयारीमा देखिन्छन् ।
जोरपाटीस्थित नेपाल मेडिकल कलेजले एमबीबीएसमा भर्नाका लागि विद्यार्थीलाई ६ लाख रुपैयाँ भन्दा बढी अतिरिक्त रकम तिर्नुपर्ने शर्त राखेको छ ।
चिकित्सा शिक्षा आयोगको म्याचिङअनुसार नेपाल मेडिकल कलेज परेपछि बुझ्न गएका विद्यार्थीलाई कलेजले तत्काल तिर्नुपर्ने ६ लाख ३० हजारको चिर्कटो थमाएको छ।
होस्टल खर्च वार्षिक १ लाखका दरले ४ वर्षको एकैपटक ४ लाख माग गरिएको छ । डिपोजिट ५० हजार, होस्टलको खाना र इन्टरनेट शुल्क भनेर १ लाख ५० हजार, बीमाको शीर्षकमा ३० हजार गरी भर्नाका लागि सुरुमै ६ लाख ३० हजार बुझाउनु पर्ने शर्त राखेको छ ।
भर्ना हुने विद्यार्थीलाई होस्टल अनिवार्य बस्नुपर्ने उर्दी कजेलले गरेको छ । होस्टलको एउटा कोठामा २ जना विद्यार्थी बस्नुपर्ने नियम बनाएको छ । एउटा कोठाको शुल्क २ विद्यार्थीबाट वार्षिक २ लाख अर्थात मासिक १६ हजार ६०० भन्दा बढीले दरले उठाउन लागिएको छ ।
त्यो पनि ४ वर्षको शुल्क एकैपटक अग्रिम मागिएको छ। ‘एक वर्षको मागेको भए ठिकै भन्नु हुन्थ्यो’ नेपाल मेडिकल कलेजमा भर्नाको तयारीमा रहेका एक विद्यार्थी भन्नुहुन्छ, ‘४ वर्षको एकै पटक किन तिर्नुपर्ने यस्तो नियम पनि कहीँ हुन्छ ?’
पहिलो कुरा त कानुन अनुसार होस्टल अनिवार्य गर्नै पाइँदैन । त्यसमाथि चर्काे शुल्क तोकेर त्यो पनि अग्रिम माग्नु कलेजको ठूलो बदमासी भएको विद्यार्थीको गुनासो छ।
खानाका लागि मात्रै एक विद्यार्थीबाट मासिक १२ हजार ५०० पनि दोब्बर महंगो भएको विद्यार्थीहरुको गुनासो छ।
खान, बस्न मात्रै २ विद्यार्थीबाट एक महिनामा कलेजले ४१ हजार ५०० भन्दा बढी मागेको छ । बाहिर सुविधाजनक फ्याट लिएर ४ जना बसेपछि त्यत्रो खर्च नलाग्ने एक विद्यार्थी बताउनुहुन्छ । ‘महिनाको १०–११ हजार तिर्दा सिंगल रुमसहितको होस्टलमा खान बस्न सहित जतिपनि पाइन्छ । त्यो पनि महिना–महिनामा तिर्दा हुन्छ’ ती विद्यार्थीले भन्नुभयो, ‘कलेजमा २० हजार भन्दा बढी मागेको छ, त्यो पनि ४ वर्षको एकै पटक।’
अर्का एक विद्यार्थीका अनुसार यत्रो शुल्क उठाए पनि होस्टल गतिलो छैन । कोठामा २ वटा सामान्य पलङ राखिएको छ । ओढ्ने, ओछ्याउने आफैँले किन्नुपर्छ । पुरानो भवनमा रहेको होस्टल निकै फोहोर पनि छ ।
कलेजले ५ वर्षपछि फिर्ता गर्ने भनेर मागेको डिपोजिट पनि नियमवीपरीत रहेको विद्यार्थीको भनाइ छ । डिपोजिट भनिए पनि अनेक बहाना बनाएर सकेसम्म फिर्ता नदिने गरेको यस कलेजका एक पूर्वविद्यार्थीको आरोप छ ।
‘डिपोजिट फिर्ता माग्न जाँदा तैले यो गरिस्, त्यो गरिस् भनेर अनेक गल्ती देखाएर सकेसम्म दिँदैन’ ती विद्यार्थीको दावी छ।
एमबीएसमा मात्रै यस कलेजले १०० विद्यार्थीको कोटा पाएको छ । नियमविपरीत डिपोजिटको रुपमा ५० लाख विद्यार्थीको पैसा उठाएर ५ वर्षसम्म चलाउने दाउ कलेजको देखिन्छ ।
बीडीएसमा ४० र बीएसी नर्सिङमा ४० विद्यार्थी नेपाल मेडिकल कलेजले पढाउन पाउँछ ।
१८० विद्यार्थीको एकै पटक ४ वर्षको ४ लाखका दरले होस्टल शुल्क उठाउँदा यो शीर्षकमा मात्रै ७ करोड २० रकम अग्रिम उठाउने योजना कलेजको देखिन्छ ।
यत्रौ पैसा एकै पटक उठाएर ४ वर्षसम्म ब्याज खान खोजेको हो’ एक विद्यार्थी, ‘हामीलाई निकै मर्का परेको छ । बल्लतल्ब पैसा जुटाएर आयोगमा बुझायौँ, अब यत्रा ६ लाख एकै कसरी जम्मा गर्नु ?’
नियमअनुसार आयोगमा १३ लाख ९० हजार शुल्क बुझाइसकेको विद्यार्थीहरुको भनाइ छ ।
६ लाख ३० हजार राष्ट्रिय बाणिज्य बैंकको खातामा जम्मा गरेपछि मात्रै भर्ना हुने उर्दी कलेजका कर्मचारीले दिएका छन् । अनावश्यक शुल्कका विषयमा सोध्दा आफूलाई तोकिएको शुल्क उठाउन मात्रै भनिएको र अन्य कुरा थाहा नभएएको जवाफ कर्मचारीबाट पाएको एक विद्यार्थीको भनाइ छ ।
६ लाख ३० हजारका दरले सबै १८० विद्यार्थीसँग शुल्क उठाए ११ करोड ३४ लाख जम्मा हुन्छ । एमबीबीएसका विद्यार्थीसँग मात्रै उठाउँदा पनि ६ करोड ३० लाख रकम उठ्ने देखिन्छ ।
एक छात्राले हेल्थपाटी समक्ष बताएअनुसार अभिभावकले बल्ल बल्ल ऋण खोजेर भर्नाका लागि आयोगमा पैसा बुझाएका थिए । तोकिएको कलेजले भर्ना हुन एक्कै पटक ६ लाख मागेपछि आफू र अभिभावक सहित निकै तनावमा रहेको ती विद्यार्थीको गुनासो छ।
एमबीबीएसका विद्यार्थीबाट काठमाडौं उपत्यका भित्रका मेडिकल कलेजले वर्षमा ४१ लाख रुपैँया शुल्क लिन पाउने चिकित्सा शिक्षा आयोगले तोकेको छ।
यस शुल्कमा अध्ययन अवधिभरमा लिने भर्ना, शिक्षण, ल्याब, पुस्तकालय, सामुदायिक तालिम, परीक्षा सबै शुल्क समेटिएको हुन्छ । राष्ट्रिय चिकित्सा शिक्षा ऐन, २०७५ को दफा २ को खण्ड (थ) अनुसार अन्य कुनै अतिरिक्त शुल्क लिन पाइँदैन।
ऐनलाई बेवास्ता गर्दै गतवर्षपनि थुप्रै मेडिकल कलेजले विभिन्न बहानामा अतिरिक्त शुल्क लिएका थिए ।
अहिले यो कलेजका मुख्य लगानीकर्ता विवादित विवादित व्यवसायी बसरुद्धिन अन्सारी हुनुहुन्छ । अन्सारी गतसाल मात्रै ४९ प्रतिशत सेयर खरिद गरेर कलेजको प्रबन्ध निर्देशकको जिम्मेवारीमा रहनुभएको हो ।
वीर गन्जमा नेशनल मेडिकल कलेज सञ्चालन गर्दै आउनुभएका अन्सारी शक्ति आर्जनका लागि समय अनुसार राजनीतिक दल परिवर्तन गर्दै हिड्ने व्यक्तिका रुपमा परिचित हुनुहुन्छ ।
पछिल्लो समय नेकपा एमालेका अध्यक्ष केपी ओलीनिकट रहनुभएको छ ।
ऐनमा भएको र व्यवस्था र तोके भन्दा बढी कुनै पनि मेडिकल कलेजले शुल्क लिन नपाउने चिकित्सा शिक्षा आयोगका अधिकारीको भनाइ छ ।
आयोगका निर्देशक प्रा.डा. रमेश प्रसाद आचार्यले मेडिकल कलेजले अतिरिक्त शुल्क लिन नपाउने, होस्टल अनिवार्य पनि गर्न नपाउने बताउनुभएको छ।
तपाईँको अभिमत