बाथरोग सेन्टरको १३ औँ वार्षिकोत्सवः अनुसन्धान, सेवा र प्रविधिलाई एकसाथ अघि बढाउँदै 

काठमाडौं । बाथरोग उपचार तथा व्यवस्थापनमा क्रियाशील नेशनल बाथरोग सेन्टरले आफ्नो स्थापना दिवसको अवसरमा विगत १३ वर्षमा हासिल भएका उपलब्धिहरू सार्वजनिक गरेको छ । 
सेन्टरले आगामी योजनाबारे जानकारी गराएको छ। संस्थाले अब उपचार सेवासँगै अनुसन्धान, प्रविधि र अन्तरसंस्थागत सहकार्यलाई थप प्राथमिकतामा राख्ने जनाएको छ।

वार्षिकोत्सव कार्यक्रममा बोल्दै त्रिभुवन विश्वविद्यालयका पूर्व उपकुलपति प्रा केदारभक्त माथेमाले स्वास्थ्य संस्थाको सफलताको मापन भवन वा उपकरणले मात्र नभई बिरामीको जीवनमा ल्याएको सकारात्मक परिवर्तनले हुने बताउनुभयो। उहाँले बाथरोगबाट पीडित व्यक्तिहरूलाई दीर्घकालीन राहत र सहज जीवनयापनमा सहयोग पुर्‍याउने कार्य प्रशंसनीय रहेको उल्लेख गर्नुभयो।

उहाँले आधुनिक स्वास्थ्य सेवाको केन्द्रबिन्दु बिरामीको जीवनस्तर सुधार हुनुपर्ने धारणा व्यक्त गर्दै उपचारको उद्देश्य केवल आयु बढाउनुमा सीमित नहुने बताउनुभयो।

कार्यक्रममा सेन्टरका अध्यक्ष तथा वरिष्ठ बाथरोग विशेषज्ञ डा विनित वैद्यले बाथरोगको चुनौती र उपचार व्यवस्थाबारे जानकारी दिनुभयो। उहाँका अनुसार बाथरोगका धेरै प्रकार प्रारम्भिक अवस्थामा सामान्य समस्या जस्तै देखिने भएकाले समयमै पहिचान हुन नसक्दा जटिलता बढ्ने जोखिम रहन्छ।

उहाँले रोगको सुरुआती अवस्थामै सही निदान र उपचार सुनिश्चित गर्न जनचेतना अभिवृद्धि, चिकित्सकको क्षमता विकास तथा अनुसन्धानलाई संस्थाले निरन्तर प्राथमिकता दिँदै आएको बताउनुभयो। आगामी दिनमा प्रविधि र नवप्रवर्तनलाई पनि संस्थागत कार्ययोजनाको महत्वपूर्ण भाग बनाइने उहाँको भनाइ थियो।

संस्थाका प्रबन्ध निर्देशक रोशन कक्षपतिले सीमित साधन र स्रोतबाट सुरु भएको सेन्टर आज देशका विभिन्न भागमा सेवा विस्तार गर्न सफल भएको बताउनुभयो। उहाँका अनुसार हाल नौ स्थानबाट सेवा सञ्चालन भइरहेको छ भने कर्णाली प्रदेशलाई लक्षित गर्दै सुर्खेतमा समेत सेवा विस्तारको तयारी भइरहेको छ।

उहाँले बाथरोगका बिरामीलाई विशेषज्ञ सेवा पहुँचयोग्य बनाउने लक्ष्यअनुसार संस्थाले निरन्तर सेवा सञ्जाल विस्तार गर्दै आएको जानकारी दिनुभयो।

वार्षिकोत्सवकै अवसरमा सेन्टरले ‘रुमा फ्युजन नेटवर्क’ नामक नयाँ पहलको घोषणा गरेको छ। यो कार्यक्रममार्फत बाथरोगसम्बन्धी अनुसन्धान, क्लिनिकल अध्ययन तथा वैज्ञानिक तथ्याङ्कको आदानप्रदानलाई संस्थागत ढङ्गले अघि बढाइने जनाइएको छ। विभिन्न अस्पताल, अनुसन्धान संस्था र विशेषज्ञ चिकित्सकबीच सहकार्य बढाउने उद्देश्यले उक्त सञ्जाल स्थापना गरिएको सेन्टरले जनाएको छ।

त्यसैगरी, बाथरोगको जोखिम पहिचान र प्रारम्भिक निदानलाई थप प्रभावकारी बनाउन डीआर–४ एचएलए परीक्षण सेवा सञ्चालनमा ल्याइएको जानकारी पनि कार्यक्रममा दिइएको थियो। विशेषज्ञहरूका अनुसार यसले रोगको सम्भावित जोखिम पहिचान गर्न र उपचार प्रक्रिया समयमै सुरु गर्न सहयोग पुर्‍याउन सक्छ।

हाल सेन्टरमा ११ जना विशेषज्ञ चिकित्सकसहित एक सयभन्दा बढी स्वास्थ्यकर्मी कार्यरत छन्। संस्थाले निकट भविष्यमा काठमाडौंको जयबागेश्वरीमा अत्याधुनिक पूर्वाधारसहितको आफ्नै भवनबाट सेवा सञ्चालन गर्ने तयारीसमेत गरिरहेको जनाएको छ।

कार्यक्रममा सहभागीहरूले बाथरोगसम्बन्धी जनचेतना विस्तार, अनुसन्धानको दायरा वृद्धि तथा विशेषज्ञ सेवाको पहुँच ग्रामीण क्षेत्रसम्म पुर्‍याउनुपर्ने आवश्यकता औँल्याएका थिए।

स्थापनाको तेह्रौँ वर्ष पूरा गर्दै नेशनल बाथरोग सेन्टरले अब  उपचार सेवासँगै अनुसन्धान, ज्ञान आदानप्रदान र प्रविधिमैत्री स्वास्थ्य अभ्यासलाई संस्थागत रूपमा विस्तार गर्ने लक्ष्य अघि सारेको छ।