जन्मदर बढाउन दम्पतीलाई १५०० अमेरिकी डलर सहयोग गर्ने चीन सरकारको प्रस्ताव

चीन सरकारले जन्मदर बढाउन दम्पतीहरूलाई सहयोग गर्ने भएको छ । बीबीसी समाचारका अनुसार सरकारले यसका लागि दम्पतीलाई १५०० अमेरिकी डलर सहयोग गर्ने प्रस्ताव अघि बढाएको छ । 

दम्पतीलाई तीन वर्ष मुनिका हरेक बच्चाका लागि वार्षिक ३,६०० युआन दिइनेछ, जुन सरकारले देशभर लागू गरेको पहिलो राष्ट्रव्यापी योजना हो।

सरकारी कम्युनिस्ट पार्टीले लगभग एक दशकअघि विवादास्पद एक सन्तान नीतिलाई हटाएको भए पनि देशको जन्मदर घट्दो क्रममा छ।

राज्य सञ्चालित सञ्चारमाध्यमका अनुसार यो सहयोगले करिब २० लाख परिवारलाई बालबच्चा पालनपोषणको खर्चमा मद्दत गर्नेछ।

विश्वको दोस्रो ठूलो अर्थतन्त्र चीनले जनसांख्यिकीय संकटको सामना गरिरहेको अवस्थामा विभिन्न प्रान्तहरूले मानिसहरूलाई बढी सन्तान जन्माउन प्रेरित गर्ने किसिमका प्रोत्साहन योजना सुरु गरेका छन्।

गत सोमबार घोषणा गरिएको यस योजनाअनुसार अभिभावकहरूले हरेक बच्चाका लागि अधिकतम १०,८०० युआन प्राप्त गर्न सक्छन्।

सरकारी टेलिभिजन सीसीटीभीका अनुसार यो नीति यस वर्षको सुरुदेखि नै लागू गरिनेछ।

सन् २०२२ देखि २०२४ को बीचमा जन्मिएका बच्चाहरूका लागि आंशिक सहायता पनि उपलब्ध हुनेछ। स्थानीय सरकारले जन्मदर बढाउन अघि सारेका प्रयासहरू पछ्याउँदै सरकारले यो कदम चालेको हो।

अध्ययनअनुसार चीनमा एक बच्चालाई १७ वर्षको उमेरसम्म पालनपोषण गर्न औसतमा ७५,७०० डलर खर्च हुने गर्छ।

जनवरीमा सार्वजनिक भएको आधिकारिक तथ्यांकअनुसार चीनको जनसंख्या सन् २०२४ मा लगातार तेस्रो वर्ष घटेको हो।