बाजी राखेर धेरै मम खाँदा २५ वर्षीय युवकको ज्यान गयो

अत्याधिक मम खाएका कारण एक भारतीय युवकको  ज्यान गएको छ। भारतीय मिडियामा आएका खबरअनुसार बिहारका ती युवाले बाजी जित्ने धुनमा धेरै मम खाएका कारण मृत्यु भएको हो । 

इन्डिया टुडेमा प्रकाशित खबरअनुसार बिहारको गोपालगन्ज जिल्लाका सिहोरवागाउँ निवासी २५ वर्षीय विपिन कुमार पासवानको ममका कारण मृत्यु भएको थियो । 

विपिन कुमार मोबाइल रिपेरिङको पसल चलाउँदै आएका थिए । गत बिहीबार पनि उनी सधैँझैँ मोबाइल पसलमै काम गरिरहेका थिए । यसैबीच उनीसहित साथीहरुको समूह जम्मा भयो । साथीहरुबीच कसले बढी मम खान सक्छ भन्ने विषयमा होडबाजी भयो । विपिन कुमारलाई एक साथीले चुनौती दिए । साथीको चुनौती स्वीकारेर विपिनकुमारले धेरै मम खाए । 

अध्याधिक मम खाएपछि आफ्नो पसल गएका उनी त्यहीँ बेहोस् भएका थिए । बेहोसभएपछि अस्तपाल पुर्‍याउँदा उनलाई चिकित्सकले मृत घोषित गरे । 

विपिनकुमारले १५० डल्ला मम खाएको भनिएको छ । 

विपिनका बुबाले मम खान चुनौती दिने सार्थीलाई हत्याको आरोप लगाएका छन् । मार्ने उद्देश्यले नै उसलाई धेरै मम खान लगाएको र विष मिसाएर दिएको समेत आरोप विपिनका बुबाको रहेको  थावे थानाका प्रहरी अधिकारीलाई उद्धृत गर्दै इन्डिया टुडेले जनाएको छ । 

गोपालगन्ज सदर अस्पतालका चिकित्सकले मम धेरै खाएकै कारण विपिनको मृत्यु भएको बताएका छन् । छिटोछिटो निल्ने होडमा मम राम्रोसँग नचपाइ निल्नु पनि मृत्युको कारण हुनसक्ने डाक्टर एस के रञ्जन बताउछन्।

ममको डल्ला घाँँटीमा तथा भोजननली कतै अड्किएका कारण पनि यति छिटो मृत्यु भएको हो कि भन्ने अनुमान डा.रञ्जनको छ । 

पोस्टमार्टम गरेर शव परिवारलाई बुझाइएको र रिपोर्ट आउन बाँकी रहेको छ । त्यसपछि मृत्युको कारण खुल्न चिकित्सकले बताएका छन्। 

प्रहरीले घटनाबारे थप अनुसन्धान गरिरहेको इन्डिया टुडेमामा प्रकाशित खबरमा उल्लेख छ ।