मधुमेह, क्यान्सरका बिरामीसहित स्वास्थ्यकर्मीको पीसीआर परीक्षण हुने
कोरोनाको उपचार निजी अस्पतालमा पनि
काठमाडौं । स्वास्थ्य तथा जनसंख्या मन्त्रालयले कोरोना परीक्षणको दायरा बढाएको छ । अब देखि मधुमेह, क्यान्सर लगायत दीर्घ बिरामी ,आइसीयू तथा आकस्मिक सेवाका लागि भर्ना भएका सबै बिरामीको अनिवार्य पीसीआर परीक्षण गर्ने भएको छ । स्वास्थ्य तथा जनसंख्या मन्त्रालयका प्रवक्ता प्रा.डा जागेश्वर गौतमले मधुमेह, क्यान्सरका बिरामी तथा स्वास्थ्यकर्मीको पीसीआर परीक्षण गरिने जानकारी दिनुभयो ।
उहाँले भन्नुभयो, परीक्षण दायरा फराकिलो बनाएका छौ, यसअघि हामीले क्वारेन्टिनमा रहेका लक्षण देखिएका व्यक्तिहरुको मात्रै परीक्षण गथ्र्याै तर अब कोरोनाको लक्षण नदेखिएका मधुमेह, क्यान्सर लगायत दीर्घ बिरामीको अनिवार्य पीसीआर परीक्षण गर्नेछौ साथै अग्र पंक्तिमा खटिएका सुरक्षाकर्मी,स्वास्थ्यकर्मी र धेरै केस देखिएका स्थानका बासीन्दाको पनि परीक्षण गर्नैछौ ।
गौतमले क्लिनिकल समन्वय समितिको निर्णय अनुसार अबदेखि सरकारी बाहेक सामुदायिक तथा निजी अस्पतालमा पनि कोरोनाको उपचार गर्ने जानकारी दिनुभयो । यो निर्णय आजैदखि लागु हुने गौतमले बताउनुभयो । यसअघि सरकारले तोकेको कोभिड अस्पतालमा मात्रै कोरोनाको उपचार हुँदै आएको थियो ।
उहाँले निजी अस्पतालको स्रोत र साधनको प्रयोग गर्न लागेको बताउनुभयो । हाल देशभरका २३ वटा प्रयोगशालाबाट पीसीआर परीक्षण भइरहेको छ । २ लाख ३७ हजार ७६४ जनाको हालसम्म पीसीआर परीक्षण भएको छ ।
तपाईँको अभिमत