कोरोना नियन्त्रणका लागि आवश्यक परे आपतकाल घोषणा गरिने : मन्त्री ढकाल

काठमाडौं, १८ फागुन । कोरोना भाइरस नियन्त्रणका लागि सरकारले तीन छु्ट्टा–छुट्टै योजना बनाएको छ । स्वास्थ्यमन्त्री भानुभक्त ढकालले पहिलो चरणमा सावधानीका लागि अपनाउनु पर्ने विषयवस्तु, दोस्रो चरणमा उपचारका लागि अपनाउनु पर्ने सम्पूर्ण शक्ति र तेस्रो चरणमा उच्च जोखिम निम्तिएको खण्डमा स्वास्थ्य आपतकाल घोषणा गर्ने सम्मको योजना बनाएर अघि बढेको बताउनुभयो । 

उहाँले पहिलो चरणको काममा विमानस्थलमा प्रत्येक यात्रुको तापक्रम मापन सुरु गरिएको बताउनुभयो । यसअघि अतिप्रभावित देश चीन, जापान लगायतका देशबाट आएका यात्रुको मात्र तापक्रम मापन गरिँदै आएकोमा अब प्रत्येकलाई इन्फ्रारेड मेशिनले तापक्रम नाप्ने व्यवस्था मिलाएको बताउनुभयो । उहाँले विमानमा प्रवेश गर्नुअघि पनि तापक्रम लिन सुरु गरिएको बताउनुभयो । 

साथीभाइसँग भेट्दा अँगालो मार्ने, हात मिलाउने भन्दा पनि टाढैबाट नमस्कार गर्दा पनि कोरोनाको संक्रमणबाट जोगिन सकिने रहेछ उहाँले भन्नुभयो । मन्त्री ढकालले धेरै भीडमा नहिँड्न  भोजभत्तेरको कार्यक्रम नगर्न पनि सबैलाई आग्रह गर्नुभयो । उहाँले दक्षिण कोरिया, अरब देशमा संक्रमण बढिरहेको र अब अर्काे छिमेकी देश भारतमा समेत संक्रमण बढेमा नेपालको स्थिति भयावह हुने भन्दै यात्रा बन्द गर्ने वा नगर्ने विषयमा औपचारिक निर्णय हुन बाँकी रहेको बताउनुभयो । अहिले हब र स्याटेलाइट अस्पताल गरि ३६ वटा अस्पताल तयारी अवस्थामा रहेको बताउँदै नआत्तिन आग्रह गर्नुभयो । 

मन्त्री ढकालले छिमेकी देशहरुमा कोरोनाको संक्रमण आक्रामक रुपमा बढिरहेको अवस्थामा नेपालले पनि उच्च सतर्कता अपनाइसकेको भन्दै आफ्नो सिमानामा संक्रमण छिर्नै नदिन कुनै कसर बाँकी नराख्ने बताउनुभयो । अहिलेको अवस्थामा कोरोना संक्रमण रोकथामका लागि द्रुत गतिमा काम गरिरहेको र यसैमा ध्यान केन्द्रित गर्नु परेकाले अन्य नियमित काममा केही असर परेको समेत बताउनुभयो ।