कोरोनाका कारण विश्वभर ठूला कार्यक्रम स्थगित : कुन देशले के– गरे

एजेन्सी, १८ फागुन । चीनपछि कोरोना भाइरसको संक्रमण बढि संख्यामा दक्षिण कोरियामा देखिएको छ । कोरियामा संक्रमण नियन्त्रणका लागि सेना परिचालन गरिएको छ ।

संक्रमण तिब्र देखिएको अर्काे देश इरानमा मृत्यु हुनेको संख्या ४३ पुगेको छ भने ५ सय ९३ जनामा संक्रमणको पुष्टि भएको छ । इरानमा पछिल्लो २४  घण्टामा  नौ जनाको मृत्यु भएको छ । इरानका उच्चपदस्थ व्यक्तिमा पनि कोरोनाको संक्रमण देखिएको छ । इरान चीनपछि धेरै मानवीय क्षति भएको देशमा परेको छ । इरानका सबै विद्यालय, कलेज बन्द गरिएका छन् ।

शनिबार सम्ममा इटालीमा कोरोना भाइरसका कारण २१ जनाको मृत्यु भएको छ भने ६ सय ५० जनामा संक्रमण देखिएको छ । दिनहुँ कोरोना भाइरसको संक्रमण देखिने देश थपिँदै गएपछि विश्वका धेरै जसो देशहरुले यात्रा तथा सम्मेलन, गोष्ठी लगायतका कार्यक्रमहरु स्थगित भएका छन् । दक्षिण कोरियाले विद्यालयहरु बन्द गरेको छ भने स्वीजरल्याण्ड, फ्रान्स लगायतका देशले भीडमा ननिस्कन भनेको छ ।
शनिबारसम्म कुन –कुन देशले के–के गरे ?

नेपाल वर्ष प्रचारात्मक कार्यक्रम स्थगित

नेपाल वर्ष २०२० का प्रचारात्मक कार्यक्रमहरु स्थगित गरेको छ । बाह्य पर्यटनको प्रचारात्मक कार्यक्रम रोकी आन्तरिक पर्यटनलाई प्रवर्दधन गर्ने निर्णय गरेको छ । कोरोना रोकथाम र नियन्त्रणका लागि उच्च स्तरीय समिति बनाएको छ । अब कोरोनासँग सम्बन्धित कार्यक्रमहरु यसै समिति अन्तर्गत गरिनेछ । यात्रा रोक्ने विषयमा निर्णय लिएको छैन ।

संयुक्त राष्ट्रसंघको महिला समानता र सशक्तीकरण सम्बन्धी सम्मेलन स्थगित

संयुक्त राष्ट्रसंघले मन्त्री र कुटनीतिक नियोगका पदाधिकारीहरुका लागि अमेरिकामा आयोजना गरेको बैठक स्थगित गरेको छ । राष्ट्रसंघका महासचिव एन्टोनियो गटर्सले पत्र लेखेर बैठक स्थगित गरेको जानकारी गराउनु भएको समाचार संस्था रोयटर्सले जनाएको छ । महिला समानता र सशक्तीकरणका विषयमा छलफल गरिने भनिएको बैठकमा करिव ७ हजार जनाको सहभागिता रहने तालिका थियो ।

आइटिबी सम्मेलन स्थगित
मार्च ४ मा जर्मनीको बर्लिनमा हुने विश्वकै सबैभन्दा ठूलो अन्तर्राष्ट्रिय पर्यटन मेला (आइटिबी) सम्मेलन स्थगित भएको छ । सम्मेलनमा १ सय ८० देशका करिब १० हजार प्रतिनिधिको सहभागिता रहने कार्यक्रम थियो । प्रत्येक वर्ष हुने सम्मेलनमा ३ लाख भन्दा बढि पर्यटकको सहभागिता रहने गर्दथ्यो ।

इटालीमा ए सिरिजका फुटबल खेल स्थगित
इटालीमा हुने ए सिरिजका फुटबल खेल स्थगन गरियो ।

थाइल्याण्ड
चीन, दक्षिण कोरिया र जापान भ्रमण गरेका यात्रुलाई १४ दिनसम्म घरमै क्वारेन्टाइनमा बस्न आग्रह ।

भियतनामले रोक्यो दक्षिण कोरियाको विमान

भियतनामले दक्षिण कोरियाबाट उडान भरेको विमानलाई अवतरण गर्न नदिई फिर्ता पठाएको छ । ४० जना यात्रु बोकेको एसियाना विमानलाई भियतनामका अधिकारीहरुले अवतरण गर्न नदिएको कोरियाका सञ्चार माध्यमहरुले जनाएका छन् ।

साउदी अरब तत्काललाई हज यात्रामा रोक

साउदी अरबले संक्रमणबाट जोगाउन आफ्ना नागरिकलाई लेबनान यात्रामा रोक लगाएको छ भने हज यात्रा तत्काललाई रोकेको छ । हजयात्राका लागि प्रत्येक वर्ष साउदीको मक्का मदिनामा करिव १८ करोड मानिस भेला हुने गर्दथे । कुवेत र रसियाले केही समय देश बाहिर यात्रा नगर्न आफ्ना नागरिकलाई निर्देशन दिएका छन् । अष्ट्रेलियाले इरानबाट हुने यात्रामा प्रतिवन्ध लगाएको छ । उज्वेकिस्तानले दक्षिण कोरियाको उडान रद्द गरेको छ ।

इरानमा सबै विद्यालय बन्द
कोरोना भाइरसका कारण इरानमा मृत्यु हुनेको संख्या ४३ पुगेको छ भने ५ सय ९३ जनामा संक्रमणको पुष्टि भएको छ । इरानमा पछिल्लो २४  घण्टामा  ९ जनाको मृत्यु भएको छ । इरानका उच्चपदस्थ व्यक्तिमा कोरोनाको संक्रमण देखिएको छ । इरान चीनपछि मानवीय क्षति धेरै भएको देशमा परेको छ । संक्रमणमा वृद्दि भएपछि इरानका सबै विद्यालय, कलेज बन्द गरिएका छन् ।

जापानका सम्पूर्ण विद्यालय बन्द
जापानले जापानका ३४ हजार ८ सय विद्यालय बन्द गरेको छ ।