विमानस्थलबाट आएको पहिलो फोनले ल्याएको खुशी 

काठमाडौं, ४ फागुन । रातभरी झिमिक्कै गरेको छैन । छोरा कहिले आइपुग्छ होला भनेर ओछ्यानमा पल्टिएर कुरेर बसिरहेकी थिएँ । बिहान तीन बजेतिर विमानको आवाज सुनेर झ्याल खोलेर विमानस्थलतिर हेर्दै टोलाइरहेको थिएँ मेसेन्जरमा छोराको फोन आयो । म त आत्तिएछु फोन उठाउन पनि अलमल परेँ । 

छोराले भन्यो ''ममी म आइपुगेँ ।'' मैले लामो सास फेरेँ । चितवनकी विमला श्रेष्ठले खुशी हुँदै भन्नुभयो– म लगायत सबै अभिभावकहरु खुशी भएका छौ ।''  चीनमा कोरोना भाइरस संक्रमणकाे महामारी देखिएदेखि नै छोराका उद्दार गरिदिन माग गर्दै उहाँ झण्डै ३ हप्तादेखि काठमाडौंमै हुनुहुन्छ । गौशालामा कोठा लिएर बस्नुभएकी उहाँ छोरा नेपाल आएपछि ढुक्क हुनुभएको छ । 

यसैगरी डा.अञ्जुली महर्जनलाइ पनि उहाँका साथीहरुले विमानबाट ओर्लने बित्तिकै  करिव साढे तीन बजेतिर आइपुग्यौँ भनेर फोन गरेका थिए । साथीहरुको फोन आएपछि मात्र आफू सुतेको बताउँदै महर्जनले उद्दारका लागि सरकारको प्रशंसा गर्नुभएको छ । 

बिहान ४ पनि बजेको थिएन छोराले फोन गरेर ममी नआत्तिनु म लगायत अरु साथी सुरक्षित रुपमा आइपुगेका छौँ, एकै छिनमा क्वारेन्टाइन जान्छौँ, त्यहाँ हामीलाई खान, बस्नको राम्रो व्यवस्था छ । अब पिर नलिनुहोला भन्यो । निकै हर्षित छु– सर्लाहीकी मीना यादवले उत्साहित हुँदै भन्नुभयो– यो खुशीको वर्णन कसरी गरुँ ? 

सरकारको चार्टड विमान मार्फत नेपाल ल्याइएका नेपालीले विमान अवतरण हुने बित्तिकै आ–आफ्नो घरमा फोन गरेका थिए । फोन गर्दा छोराछोरीले थकित छौं, उत्साहित छौँ, खुशी छौँ अलिअलि नर्भस पनि भएका छौँ भनेर कुरा गरेको अभिभावकहरुले बताएका छन् । सम्पूर्ण अभिभावकहरु छोराछोरीको फोन नआउञ्जेल निदाउन सकेनन् । सबैले सुरक्षित र स्वस्थ वातावरणमा नेपाल आएको जानकारी अभिभावकलाई गराएका थिए । 

क्वारेन्टाइनमा रहुञ्जेल उनीहरुको दुई पटक (थ्रोट स्वाव) घाँटीको र्यालको परीक्षण गरिनेछ । पहिलो चरणमा क्वारेन्टाइन पुगेको २४ घण्टाभित्र र अर्काे जाँच १४ दिनमा गरिनेछ । सबै नेपालीको क्वारेन्टाइनमा ६० वटा कोठामा १ सय ९९ बेडको व्यवस्था गरिएको छ । एउटा कोठामा उचित दुरीको फरकमा एकदेखि ३ जनासम्मको सामूहिक बसोबासको व्यवस्था छ । 

यस्तै क्वारेन्टाइनमा ६ जनाले एक शौचालय प्रयोग गर्ने गरि व्यवस्था गरिएको छ । क्वारेन्टाइनमा रहने नेपाली विद्यार्थीहरुले प्रत्येक पटक दिनको दुईपटक तापक्रम लिनुपर्नेछ । क्वारेन्टाइनमा २४ सै घण्टा स्वास्थ्यकर्मी रहने छन् ।  

नेपाल आउन चाहेका १ सय ८५ मध्ये ६ जनालाई तापक्रम बढेको देखिएपछि नेपाल आउन अनुमति दिइएन । अरु ४ जना स्वंयमले अहिले आफू नेपाल आउन नचाहेको बताएका थिए । अहिले १ सय ७५ जना नेपाली क्वारेन्टाइमा रहेका छन् ।