अमेरिकी राष्ट्रपति ट्रम्पद्वारा विश्व स्वास्थ्य संगठनबाट बाहिरिने प्रक्रियामा हस्ताक्षर
हेल्थपाटी - माघ ०८, २०८१ १०:०९ मा प्रकाशित
अ +
अ -
अमेरिकी राष्ट्रपति डोनाल्ड ट्रम्पले विश्व स्वास्थ्य संगठन (डब्लूएचओ)बाट आफ्नो मुलुक बाहिरिने प्रक्रियामा हस्ताक्षर गर्नुभएको छ । अन्तर्राष्ट्रिय सञ्चारमाध्यमका अनुसार कोभिड–१९ महामारीमा डब्लूएचओले भ्रमपूर्ण कार्य गरेको भन्दै अमेरिकाले बाहिरिने प्रक्रिया अघि बढाएको हो ।
योसँगै अमेरिका १२ महिनाभित्र राष्ट्रसंघीय स्वास्थ्य एजेन्सीबाट बाहिरिनेछ । त्यसपछि अमेरिकाले गर्दै आएको आर्थिक योगदान पनि रोक्नेछ । अमेरिका डब्लूएचओको सबभन्दा ठुलो आर्थिक योगदानकर्ता हो । उसले करिब १८ प्रतिशत अािर्थक योगदान गर्दै आएको थियो । सन् २०२४–२०२५ मा अमेरिकाले ६.८ अर्ब डलर डब्लूएचओमा योगदान गरेको थियो ।
डब्लूएचओबाट बाहिरिने प्रक्रियामा हस्ताक्षर गर्दै राष्ट्रपति ट्रम्पले डब्लूएचओ निष्पक्ष हुन नसकेको आरोप लगाउनुभयो । उहाँले डब्लूएचओ कुनै एक राष्ट्रको राजनीतिक प्रभावमा परेको बताउनुभयो ।
‘डब्लूएचओले हामीलाई विभेद गर्यो, अमेरिकी सबैमा विभेद भयो’, ट्रम्पले भन्नुभयो, ‘अब यस्तो हुने छैन ।’
ट्रम्पको यो कार्यलाई अनपेक्षित नठानिएको समाचारमा भनिएको छ । उहाँले यसअघि आफ्नो पहिलो कार्यकालमै सन् २०२० मा डब्लूएचओबाट बाहिरिने प्रक्रियामा कदम चाल्नुभएको थियो ।
तपाईँको अभिमत