बेलायतले नेपाली नर्स लैजान मार्चसम्म सम्झौता गर्ने, न्यूनतम तलब ४९ हजार पाउण्ड
तुलसा घिमिरे- माघ ०१, २०७८ १०:११ मा प्रकाशित
अ +
अ -
नेपाली नर्सलाई रोजगारी दिनका लागि बेलायत तयार भएको छ । यसअघि बेलायतले नर्सलाई रोजगारी दिने भनिएको भए पनि औपचारिक निर्णय भने भएको थिएन । नर्स लैजाने विषयमा बेलायतले नेपालसँग आगामी मार्चसम्म श्रम सम्झौता गर्ने तय भएको छ ।
श्रम सम्बन्ध कायम गर्ने विषयमा दुई देशका अधिकारीबीच शुक्रबार पहिलो पटक भएको वार्तामा बेलायतले नेपाली नर्स लैजाने र नेपालले नर्स पठाउने सहमति भएको श्रम रोजगार तथा सामाजिक सुरक्षा मन्त्रालयका प्रवक्ता डण्डुराज घिमिरेले जानकारी दिनुभयो ।
बेलायतको ‘डिपार्टमेन्ट अफ हेल्थ सर्भिस’ र ‘नेशनल हेल्थ सर्भिस’ का प्रतिनिधि र नेपाल सरकारका प्रतिनिधिबीचको वार्ताबाट यस्तो सैद्धान्तिक सहमति जुटेको उहाँले बताउनुभयो ।
उहाँले नेपाली श्रमिक(नर्स) र बेलायतको श्रमिकबीच कुनै भेदभाव नगर्ने सहमति भएको जानकारी दिनुभयो । बेलायतको श्रमिकले पाउने जत्तिकै न्यूनतम तलब र सुविधा नेपाली श्रमिकले पनि पाउने उहाँले बताउनुभयो । ‘बेलायतको नर्सको तलब वार्षिक न्यूनतम ४९ हजार पाउण्ड रहेछ, अब सहमति अनुसार नेपाली नर्सले पनि सोही सुविधा पाउनेछन्,’ घिमिरेले भन्नुभयो । वार्षिक ४९ हजार पाउण्ड भनेकाे नेपाली ७० लाख रुपैयाँ बढी हुन आउँछ ।
नेपालले जति संख्यामा नर्स उपलव्ध गराउनसक्छ त्यतिनै नर्सलाई बेलायतले रोजगारीको अवसर दिने बताएको घिमिरेले जानकारी दिनुभयो । ‘हामीले जति नर्स दिनसक्छाैं त्यतिनै लिने भन्ने कुरा भएकाे छ, बेलायत सरकार आफैंले सम्पूर्ण खर्च व्यहोरेर नर्स लैजाने सहमति भएको छ,’ घिमिरेले भन्नुभयाे ।
सहमति अनुसार समझदारीको मस्यौदा निर्माणमा दुवै पक्ष जतिसक्दाे छिटो टुङ्गोमा पुर्याइने छ । अब दुवै पक्ष समझदारीको मस्यौदामा जुट्ने छन् । यद्यपि, नेपाली नर्स लैजाने मोडालिटीको बारेमा भने टुङ्गो नलागेको उहाँले बताउनुभयो। नर्स लैजाने भन्ने विषयमा दुईदेश बीच पहिलो वार्ता भएकाले मोडालिटीबारे थप छलफल गरि टुंग्याइने प्रवक्ता घिमिरेले बताउनुभयो ।
अहिले नेपालमा ६७ हजार बढी नर्स नेपाल नर्सिङ परिषदमा दर्ता छन् ।
तपाईँको अभिमत