कोरोना संक्रमितले आइसियु भरिए, युवायुवतीको संख्या बढी

काठमाडौं ।  स्वास्थ्य तथा जनसंख्या मन्त्रालयले कोरोना भाइरस संक्रमण उकालोतर्फ लागेकोप्रति चिन्ता व्यक्त गर्दै उच्च सावधानी अपनाउन सर्वसाधरणलाई अपिल गरेको छ । मन्त्रालयका प्रवक्ता प्रा.डा.जागेश्वर गौतमले केहीदिन यता आइसियुमा संक्रमित भर्ना हुनेक्रम बढेको जानकारी दिनुभयो । उहाँका अनुसार आइसियुमा भर्ना हुने संक्रमितमा धेरै युवायुवती हुनुहुन्छ ।

कोरोनाको डर हराउदै जाँदा स्वास्थ्यका मापदण्डप्रति वेवास्ता गर्नुले संक्रमणलाई बढावा दिएको विज्ञहरुले बताइरहेका छन् । नेपालमा कोरोनाको नयाँ प्रजाति भित्रिएको र स्वास्थ्यमा मापदण्ड कडाइका साथ पालना नहुँदा बालबालिका तथा युवायुवतीहरु बढी जोखिममा रहेको गौतमले बताउनुभयो । 

शहिद शुक्रराज ट्रपिकल तथा सरुवा रोग अस्पताल टेकुका प्रमुख कन्सल्टेन्ट डा.अनुप बाँस्तोलाले १५ दिनयता अस्पतालमा भर्ना हुने संक्रमितको संख्या बढ्दै गएको बताउनुभयो । भर्ना भएकामध्ये ५० वर्षभन्दा कम उमेरका संक्रमितको संख्या झण्डै आधा रहेको उहाँले बताउनुभयो । 

यसैगरी बलम्बुस्थित सशस्त्र प्रहरी अस्पतालका प्रवक्ता डा.प्रविण नेपालले विगत १० १२ दिनयता संक्रमितको संख्या बढेको बताउदै पहिलाको तुलनामा कम उमेरका व्यक्तिहरुमा संक्रमण बढेको जानकारी दिनुभयो । अहिले १७ वर्षदेखि ७७ वर्षउमेर सम्मका संक्रमितहरु भर्ना भएको उहाँले बताउनुभयो । ‘पहिला बुढापाकाहरु संक्रमणले सिकिस्त भई अस्पताल आउनुहुन्थ्यो तर अहिले अवस्था अलि फरक छ । नेपालले भन्नुभयो युवायुवतीहरु पनि गाह्रो भयो भनेर अस्पताल आउने क्रम बढेको छ ।’ 

आज काठमाडौं उपत्यकामा १५४ सहित देशरभ ३०३ जनालाई संक्रमण पुष्टि भएको छ । संक्रमण बढेसँगै स्वास्थ्य मन्त्रालयले विद्यालय तथा २५ जनाभन्दा बढी भीड हुने क्षेत्र बन्द गर्न सरकारलाई प्रस्ताव गरेको छ । यद्यपी सरकारले यसबारे निर्णय लिइसकेको छैन ।