स्नातक तहको प्रवेश परीक्षा साउन ९ गतेदेखि, पीसीआर रिपोर्ट अनिवार्य

काठमाडौं । चिकित्सा शिक्षा स्नातक तह शैक्षिक सत्र २०७७/ ७८ को एकीकृत प्रवेश परिक्षा साउन ९ देखि १३ गतेसम्म हुने भएको छ । चिकित्सा शिक्षा आयोगले परिक्षा तालिका सार्वजनिक गर्दै ७२ घण्टाभित्रको पीसीआर रिपोर्टसहित परिक्षामा सहभागी हुन परिक्षार्थीलाई अपिल गरेको छ ।

संक्रमित परिक्षार्थीलाई छुट्टै कोठामा राखी परिक्षा लिइने भएकाले रिपोर्ट पोजेटिभ आएकाहरुले आयोगलाई इमेल मार्फत अगावै जानकारी गराउन पनि अनुरोध गरिएको छ । 

आयोगका अनुसार साउन ९ गते एमबीबीएस, साउन १० गते बीडीएस, साउन ११ गते बीएससी नर्सिङ/बीएएसएलपी/बी परफ्युसन टेक्नोलोजी, साउन १२ गते बीएएमएस / बीएनएस/ बीएससी/एमएलटी/बीएससी/एमआइटी/बी फर्म अप्टोमेट्री/ बीपीटी र साउन १३ गते बीपीएचको परिक्षा हुनेछ । 

प्रवेश परीक्षाका लागि २५ हजार भन्दा बढी परिक्षार्थीले आवेदन दिएका छन् । परीक्षा केन्द्र भने असार ७ गतेको आयोगको सूचनाअुनसार परीक्षार्थीले छनौट गरेको अनुसारनै तर विदेशी र परिक्षा केन्द्र छान्न छुटेका परिक्षार्थीको परिक्षा केन्द्र उपत्यकामा कायम गरिएको आयोगले जनाएको छ ।

कोभिड - १९ संकट व्यवस्थापन केन्द्र (सिसिएमसी)ले कोरोना संक्रमणको अवस्थालाई मध्यनजर गर्दै स्वास्थ्य सुरक्षाका उपायहरु पूर्ण रुपमा पालना गराइ उपत्यका भित्र र बाहिर परीक्षा सञ्चालन गर्न अनुमति दिएको थियो ।