भोट हाल्नै छाडेर बिरामीको सेवामा स्वास्थ्यकर्मी, भन्छन् -‘आफ्नो कर्तव्य पूरा गर्नुछ ’
आज देशभर स्थानीय तहको निर्वाचन भइरहेको छ । मतदानका लागि मतदाताहरु मतदान स्थलमा गइसकेका छन् । कतिपयले आफ्नो नाम मतदाता नामावलीमा टिपाएका छैनन् । कोही नाम टिपाएर पनि मतदान गर्न जान पाएका छैनन् । धेरै मतदाता त्यस्त पनि छन् जो मताधिकारको बारेमा जानकार छन् तर आफ्नो कर्तव्य पहिले आउने भएकाले आफ्नो अधिकारलाई पन्छाउन बाध्य छन् ।
देशको सेवामा खटिएका कर्तव्यनिष्ठ कर्मचारीहरु, सुरक्षाकर्मी, पत्रकार, स्वंयमसेवक, पर्यवेक्षकहरु आफ्नो मत दिने अधिकार भएर पनि आफ्नो जिम्मेवारीले गर्दा मतदान गर्नबाट बञ्चित छन् । त्यसमध्ये स्वास्थ्य क्षेत्रमा दिनरात नभनेर खटिएका धेरै चिकित्सक, नर्स लगायत स्वास्थ्यकर्मीहरुले पनि जिम्मेवारीका कारण मत हाल्न पाएनन् ।
पोखरा स्वास्थ्य विज्ञान प्रतिष्ठानका इमरजेन्सी वार्डका इन्चार्ज नगेन्द्र ठकुरी यसपाली मतदानवाट वञ्चित हुनुभएको छ। पोखरा स्वास्थ्य विज्ञान प्रतिष्ठानमा ११ वर्ष देखि कार्य गर्दै आउनुभएका ठकुरीलाई मतदान गर्ने इच्छा थियो तर बिरामीको उपचार गर्नपर्ने भएकाले उहाँले मताधिकारीको प्रयोग गर्न पाउनुभएन । उहाँले आफ्नो कर्तव्य पूरा गर्न आफूले पाएको अधिकारलाई थाती राख्न पर्यो ।
गोरखा जिल्ला पालुङटार नगरपालिका लिगलिगकोटमा मतदान स्थल रहेको ठकुरी, स्वास्थ्य त्यसमा पनि इमरजेन्सी वार्ड एकदमै संवेदनशील ठाउँ भएकोले ड्यूटी छोडेर मतदान गर्न नगएको बताउनुहुन्छ । निर्वाचनको दिन अस्पताल आउने बिरामीको सेवाकै लागि यसपटक मतदानमा नगएको उहाँको भनाइ छ ।
प्रत्येक ५ /५ वर्षमा आउने स्थानीय तहको निर्वाचनमा आफ्नै ठाउँमा गएर आफूले रोजेको व्यक्तिलाई भोट हाल्नुपर्छ । आफ्नो गाउँ गएर आफूले रोजेको उम्मेदवारलाई मतदान गर्न नपाउँदा आफुलाई खिन्न लागेको उहाँ बताउनुहुन्छ । तथापी आफ्नो जिम्मेवारीलाई पर सार्न नमिल्ने उहाँको बुझाइ छ ।
ठकुरीले आफ्नो मातहतका स्थानीय सहकर्मीलाई डयूटी मिलाएर मतदान गर्ने वातावरण मिलाएको जानकारी दिनुभयो ।
त्यस्तै जनकपुर घर भएका पोखरा स्वास्थ्य विज्ञान प्रतिष्ठानमै कार्यरत अर्का चिकित्सक डा.सुरेन्द्र दास पनि मतदान गर्न जान नपाउदा दुःखी हुनुन्छ ।
अहिले युवाहरुले देश हाक्छु भनेर लागिपरेकाले युवालाई अगाडी बढाउन मतदान गर्न जान मन थियो सुरेन्द्रलाई । ‘अरु वार्डमा कार्यरत भए विदा लिएर जान मिल्थ्यो तर इमरजेन्सी वार्ड संवेदनशील भएकोेले २४ सै घण्टा आफुहरु तैनाथ भएर बस्नुपर्ने भयो,’उहाँ भन्नुहुन्छ ।
आफूले भोट नहालेपनि घरका अन्य सदस्यलाई भने उदासीले आफ्नो मतदान गर्ने अधिकारको सही उपयोग गर्न सुझाव दिनुभएको छ । डडेल्धुरावाट प्रतिष्ठानमा इन्टर्नसिप गरिरहनु भएकी डा.‘माया बुढाले आफ्नो जिम्मेवारीका कारण मतदान गर्नवाट बञ्चित हुन परेको बताउनुभयो।
यस्तै तनहुँ घर भएर हाल प्रतिष्ठानमै कार्यरत नर्स सरिता कार्कीले आफ्नो डिपार्टमा कुनै समस्या नभएको भयो । आफु पनि मतदान गर्न जाने र अरु कर्मचारीहरुले पनि डयूटी मिलाएर मतदान गर्न जाने व्यवस्था मिलाएको उहाँले बताउनुभयो ।
पोखरा स्वास्थ्य विज्ञान प्रतिष्ठानका शाखा अधिकृत तथा सुचना अधिकारी सुमन भट्टराईले निर्वाचन आयोगवाटै विदा नदिन भनिएकाले कोही कर्मचारीलाई विदा नछुट्टाइएको बताउनुभयो । भट्टराईले प्रतिष्ठानमा कुल ६ सय ८४ जना कर्मचारी रहेकोमा १८ जना मात्र निर्वाचन र बाँकी सबै जनालाई अस्पतालमा नै खटाइएको जानकारी दिनुभयो ।
तपाईँको अभिमत