स्वास्थ्य मन्त्रालयको ‘सिल्ली मिस्टेक’ : ४ बजे समय सकियो, खोप लगाउन जानुहोस् भन्दै ४:३० बजे सूचना
स्वास्थ्य तथा जनसंख्या मन्त्रालयको बुधबार प्रेस ब्रिफिङमा मन्त्रालयले एक झुर गल्ती गरेको छ। मिति र समयलाई राम्रो ख्याल नगर्दा मन्त्रालयले सिल्ली मिस्टेक गरेको हो।
कोभिड–१९ विरुद्धको खोप लगाउने सूचनामा मन्त्रालयका सहप्रवक्ता डा. समीर कुमार अधिकारीले खोप लगाउने समय सकिएपछि प्रत्यक्ष प्रसारणमा सूचना पढेर सुनाउँदै खोप लगाउन जान आग्रह गर्नुभएको छ।
मंसिर ७ र ८ गते काठमाडौं महानगरपालिकाले ३२ वटै वडामा खोप लगाउन कार्यक्रम राखेको थियो।
उक्त सूचना स्वास्थ्य मन्त्रालयले आफ्नो फेसबुक पेजमा मंगलबार(७) गते साँझ ५ः२१ बजे र लगभग सोही समयमा मन्त्रालयको भाइबर ग्रुपमा अपलोड गरेको थियो। जतिबेला उक्त सूचना अनुसारको खोप लगाउने समयको एक दिनको समय सकिइसकेको थियो।
उक्त सूचनामा मंसिर ७ र ८ गते बिहान १० बजेदेखि ४ बजेसम्म खोप लगाइने भनिएको छ। सूचना अनुसार ८ गते अपरान्ह ४ बजे खोप लगाउने समय सकिइसकेको थियो।
तर त्यही स्वास्थ्य मन्त्रालयका सहप्रवक्ता अधिकारीले बुधबारको प्रेस ब्रिफिङमा त्यही सूचना पढ्दै खोप लगाउन जाने आग्रह गरेको देखियो। उहाँले त्यो सूचना पढिरहँदा साढे ४ नाघिसकेको थियो। मतलब खोप लगाउने समय सकिएको ३० मिनेट भन्दा बढी भइसकेको थियो।
प्रत्यक्ष प्रसारणमा उक्त सूचना स्किनमा देखाउँदै मन्त्रालयका सह–प्रवक्ता अधिकारीले उमेर खुल्ने परिचय पत्र लिएर खोप लगाउन जान आग्रह गरिरहनु भएको थियो।
अझ कुन वडामा कहाँ खोप लगाइन्छ भनेर केही वडाका खोप लगाउने केन्द्रको नाम समेत पढेर सुनाउनु भएको थियो।
नेपाल टेलिभिजन र ८ लाख बढी प्रयोगकर्ताको लाइक भएको फेसबुकबाट लाइभ भएको कार्यक्रममा म्याद सकिएको सूचना पढेर स्वास्थ्य मन्त्रालयले दर्शकलाई उल्लु बनाउने काम गरेको छ।
तपाईँको अभिमत