'मुटुरोग न्यूनीकरण गर्ने एकमात्र उपाय नियमित शारिरीक व्यायाम हो' (भिडियो)
हेल्थपाटी - आश्विन १३, २०८१ १८:४६ मा प्रकाशित
अ +
अ -
मुटुरोगबाट बच्ने एकमात्र उपाय नियमित शारिरीक व्यायाम रहेको वरिष्ठ मुटुरोग सर्जन डा. अनिल भट्टराईले बताउनुभयो । हेल्थपाटीसँगको कुराकानीमा उहाँले मुटुसँग सम्बन्धित रोगबाट बच्न हरेक दिन कम्तिमा आधा घण्टा व्यायाम गर्नुपर्ने बताउनुभएको हो ।
हरेक दिन आधा घण्टा वा एक घण्टा शारिरीक व्यायाम गर्दा केही हदसम्म मुटुरोगबाट बच्न सकिने उहाँको भनाइ छ । ‘मुटुरोगलाई न्यूनीकरण गर्ने एउटा मात्र उपाय भन्नुहोस् भन्नुहुन्छ भने त्यो हो नियमित शारिरीक व्यायाम’, उहाँ भन्नुहुन्छ, ‘खाएर सञ्चित रहने क्यालोरीलाई खर्च गराउने र अनावश्यक कोलेस्टेरोल, बोसो, सुगरलगायतको मात्रालाई कम गर्ने भनेको शारिरीक व्यायामले नै हो ।’
कोलेस्टेरोल, बोसो तथा सुगर जस्ता तत्त्वले मुटुरोगको जोखिम बढाउने भन्दै उहाँले त्यस्ता तत्त्व व्यायामले नै कम गराउने बताउनुभयो ।
कम्तिमा प्रत्येक दिन आधा घण्टा व्यायाम गर्न डा. भट्टराईको सुझाव छ । सकेसम्म एक घण्टा व्यायाम गर्दा राम्रो हुने उहाँ बताउनुहुन्छ । ‘व्यायाम गर्दा शरीरमा मज्जाले पसिना आउनुपर्यो’, उहाँ भन्नुहुन्छ, ‘तपाईँको स्वासप्रश्वासको छिटोछिटो हुन्जेल हुनुपर्यो र मुटुको चाल पनि छिटोछिटो धड्किने गरी हुनुपर्यो ।’
उहाँले व्यायामको नाममा कोठाभित्र हिँड्ने कामले व्यायाम नहुने भन्दै प्रभावकारी शारिरीक व्यायाम गर्नुपर्ने बताउनुभयो ।
डा. भट्टराईले प्रभावकारी शारिरीक व्यायाम गर्दा मुटुरोग लाग्ने उमेर पर सार्न सकिने बताउनुभयो । ‘५० वर्षमा हुनसक्ने हार्ट एट्याक ७० वर्षमा लाग्न सक्छ नि त !’, उहाँ भन्नुहुन्छ ।
हेर्नुहोस् डा. भट्टराईसँग हेल्थपाटीका लागि कार्यकारी सम्पादक केदार गौतमले गर्नुभएको कुराकानी :
तपाईँको अभिमत