भारतको पञ्जाबमा पनि रात्रिकालिन कर्फ्यू
चण्डीगढ । कोरोना संक्रमण तीव्र रुपमा फैलिन थालेपछि भारतको पञ्जाब प्रान्तमा पनि रात्रिकालिन कर्फ्यूको घोषणा भएको छ । पञ्जाबभर राति ९ बजेदेखि बिहान ५ बजेसम्म कर्फ्यू लागू हुने भारतीय सञ्चारमाध्यमले जनाएका छन् ।
यसअघि महाराष्ट्र प्रान्तमा रात्रिकालिन कर्फ्यू लागू भएको थियो ।
कर्फ्यूसँगै राजनीतिक, सामाजिक, सांस्कृति वा खेलकुदसँग सम्बन्धित कुनै पनि भेला गर्न प्रान्त सरकारले प्रतिबन्ध लगाएको छ । त्यस्तै मृत्यु संस्कार तथा विवाहमा ५० देखि १०० जनामात्र सहभागी हुन पाइने बताइएको छ । हलभित्र ५० र बाहिर १०० जना सहभागी भएर विवाह जस्ता कार्य सम्पन्न गर्नु प्रान्त सरकारले नियम लागू गरेको हो ।
सरकारी कार्यालयमा कर्मचारीले मास्क अनिवार्य लगाउनुपर्ने समेत नयाँ नियममा उल्लेख छ ।
यसअघि विद्यालय बन्द गर्ने निर्णय अप्रिल ३० सम्म जारी रहनेछ । नियमअनुसार साना पसलहरू वा स्टोरहरूमा एकपटकमा १० जना मात्र सामान किन्नलाई पस्न पाउने तथा ठुला मलमा १०० जना पस्न पाउने नियम लागू भएको छ ।
पछिल्लो समय भारतमा कोरोना संक्रमण पुनः तीव्र बनेपछि नयाँ नियम लागू गरिएको हो ।
भारतमा मंगलबार १ लाख १५ हजार २६९ नयाँ कोरोना संक्रमित भेटिएका थिए भने ६३१ संक्रमितको ज्यान गएको थियो ।
तपाईँको अभिमत