कोरोना महामारी : भारतमा अर्काे महिना तेस्रो लहर सुरु हुने चर्चा

युरोप र एसियाका केही देशमा कोभिड–१९ महामारीको तेस्रो लहर देखा परिरहेको छ । छिमेकी मुलुक भारतमा पनि तेस्रो लहरको सम्भावनाबारे चर्चा सुरु भएको छ । 

भारतमा कोरोना महामारीको दोस्रो लहर सुरु भएको महाराष्ट्र राज्यमा आगामी डिसेम्बरमा तेस्रो लहर आउन सक्ने आशंका विज्ञहरुले गरेका छन् । 

महाराष्ट्र राज्यका स्वास्थ्य मन्त्री राजेश टोपे बुधबार आफ्नो धारणा राख्दै तेस्रो लहर आउँछ तर त्यो दोस्रो लहर जस्तो खतरनाक नहुने बताएका छन् । 

राज्यका ८० प्रतिशतले  खोप लगाइसकेको र लगाउने क्रम जारी रहेकाले पनि तेस्रो लहरमा पहिलेको  जस्तो क्षति नहुने मन्त्री टोपेको भनाइ छ । 

तेस्रो लहरमा कोरोना संक्रमितलाई अक्सिजन र आइसीयू बेड नचाहिने दावी उनले गरे । कोभिड–१९ का नयाँ नयाँ लहरहरु समय–समयमा आइरहेने आँकलन विज्ञहरुले गरेका छन् । 

भारतमा २०२१ अप्रिलमा कोरोना महामारीको दोस्रो लहर सुरु भएको थियो । त्यसले ठूलो क्षति गर्यो । भारतमा दोस्रो लहर सुरु भएको करिब १ महिनापछि नेपालमा पनि दोस्रो लहर सुरु भएको थियो । पहिलो लहरमा कम क्षति व्यहोरेको भारत र नेपाल दुवैमा दोस्रो लहरमा अवस्था भयावह बनेको थियो । 

अस्पतालमा संक्रमित बिरामीको उपचार गर्न बेड नहुने, अक्सिजनको अभावमा मृत्यु हुने, संक्रमणबाट मृत्यु भएकाको अन्त्येष्टि गर्न समेत स्थान अभाव हुने समस्या भारत र नेपालमा कोरोना महामारीको दोस्रो लहरका बेला देखिएको थियो ।