२७ वर्ष पुरानो भ्रुणबाट जन्मिएकी मोलीकाे विश्व रेकर्ड, आमाभन्दा १८ महिना कान्छी
काठमाडौं । भर्खरै जन्मिएकी एक बालिका आफ्नी आमाभन्दा जम्मा १८ महिना मात्रै कम उमेरकी छिन् । यो कुरा सुन्दैमा अचम्म लाग्छ । के यस्तो कुरा पनि सम्भव छ ? प्रश्न उठ्न सक्छ । तर विज्ञान, प्रविधिको चमत्कारले यस कुरालाई सम्भव बनाइ दिएको छ ।
अमेरिकाको टेनेस्सी राज्यको नोक्सभिल शहर निवासी २९ वर्षीय महिला टिना गिब्सनले गत अक्टुबरमा जन्म दिएकी छोरी भ्रुणको रुपमा रहँदा टिना जम्मा १८ महिनाकी मात्रै थिइन् । टिनाका पति बेन्जामिन ३६ वर्षका छन् । आज भन्दा २७ वर्ष पहिला अर्थात सन १९९२ मा एक दम्पतिले दान गरेको भ्रुणबबाट टिनाले छोरी जन्माएकी हुन् ।
त्यतिबेला एक दम्पतिले दान गरेको भ्रुणलाई फ्रिजमा सुरक्षित राखिएको थियो । सोही भ्रुणलाई टिनाको गर्भमा राखिएपछि गत फेब्रअरी २६ मा ती बच्चीको जन्म भएको हो । बच्चीको नाम मोली एभर्ट गिब्सन हो । मोलीको जन्मले विश्वमा नयाँ रेकर्ड बनाएको छ । उनी विश्वमै सबैभन्दा लामो समय फ्रिजमा राखिएको भ्रुणबाट जन्मिएकी बच्चा बनेकी छिन् ।
यसअघि उनकै दिदी एम्मा व्रेनको नाममा यो रेकर्ड थियो । २०१७ को नोभेम्बरमा जन्मिएकी एम्मा २४ वर्षअघि दान गरिएको भ्रुणबाट जन्मिएकी थिइन् ।
टेनेसीस्थित 'नेसनल इम्ब्रियो डोनेसन सेन्टर'को रेकर्ड अनुसार यसअघि सन् २०१७ मा यही जोडीले एम्मालाई जन्म दिएका थिए। अझै रोचक, एम्माको भ्रूण पनि मोलीकै भ्रूणदाताको हो।
यसरी एकै दाताको भ्रूणहरूबाट एम्मा र मोलीको जन्म भएको हो। अनि अहिले उनीहरूका आमाबुवा पनि एकै हुन्। भ्रुणलाई लामो समय फ्रिजमा राख्नसक्ने प्रविधि विकास भएका कारण यो सम्भव भएको चिकित्सकहरुले बताएका छन् ।
एजेन्सीकाे सहयाेगमा
तपाईँको अभिमत