नम्र व्यवहार र दया भाव भएका व्यक्तिको आयू बढ्ने

हरेक दिन दया भाव जागृत भई अरूलाई सहयोग गर्ने मानिसको स्वास्थ्य सामान्य मानिसको भन्दा राम्रो हुने अध्ययनले देखाएको छ । नम्र व्यवहार, स्वयंसेवा, चन्दा सहयोग तथा हरेक दिनको दयालु व्यवहारले मुटुसँग सम्बन्धित रोगबाट जोगाउने देखिएको हो ।

अरूलाई सधैँ सहयोग गर्ने मानिसको चाँडै मृत्यु हुने जोखिम २४ प्रतिशतसम्म कम हुने अध्ययनले देखाएको छ । त्यस्तै सहयोगी मानिसको अस्पताल भर्ना हुने सम्भावना ३८ प्रतिशतसम्म कम हुने सो अध्ययनले देखाएको छ ।

दया भावले सधैँ सकारात्मक सोच पैदा हुने र सकारात्मक सोचले स्वास्थ्यमा पनि सकारात्मक प्रभाव पार्ने विज्ञहरूले बताएका छन् ।
दया भावका फाइदाहरू
असल हर्मोन उत्पादन :  कसैलाई सहयोग गर्दा तपाईँलाई खुसी महसुस हुन्छ । यसले दिमागमा पनि आनन्द पैदा गराउँछ ।
डर, त्रास हटाइदिन्छ :  कसैप्रतिको दया वा सहयोगले तपाईँमा भएको डर वा त्रासलाई मेटाइदिन्छ । तपाईँका मनोभावनालाई दरो बनाइदिन्छ । तपाईँमा आत्मविश्वास पनि बढेर आउँछ ।

दयाले मुटुमा सकारात्मक प्रभाव : दया भावले मुटुमा न्यानो स्पर्श गर्छ । अरूप्रतिको दया भावले मुटुमा रसायनलाई सन्तुलित गराउँछ । यसले मुटुजन्य रोगबाट टाढा रहन मद्दत गर्छ ।

तनाव कम गराउँछ : सधैँ व्यस्त रहँदा वा सोचे भन्दा फरक काम हुँदा तनाव हुन्छ । यस्तो बेला तनाव कम गर्ने सजिलो उपाय अरूलाई सहयोग गर्नु हो । अरूलाई सहयोग गर्दा तनाव घटेर जान्छ ।

बिरामी हुनबाट जोगाउँछ : दयाले बिरामी हुनबाट जोगाउँछ । एक अध्ययनका अनुसार ५७ देखि ८५ वर्ष उमेरका मानिसले स्वयंसेवा गर्दा मधुमेह, क्यान्सर लगायतका दीर्घ रोगको जोखिम कम देखिएको छ । 
(एजेन्सीहरूको सहयोगमा)