यी व्यक्तिहरुलाई कोरोना खोप दिनु पहिले चिकित्सकको विशेष निगरानी आवश्यक
काठमाडौं । कोरोना महामारी फैलिएको करिब एक वर्षपछि केही मुलुकले यसविरुद्ध खोप विकास गगरिसकेका छन् । कयौँ मुलुकले खोप अभियान चलाइरहेका छन् । हालसम्म फाइजर–बायोएनटेक, मोडर्ना, अक्स्फोर्ड–एस्ट्राजेनेका लगायतका कोरोना खोप आपत्कालिन रूपमा आम मानिसलाई दिन थालिएको छ ।
प्रयोगमा ल्याइसकिएका कोरोना खोपका साइड इफेक्ट कमै रहेको बताइएको छ । तर कतिपय मानिसमा भने खोपले खराब असर गर्ने बताइएको छ । ती मानिसलाई चिकित्सकको विशेष निगरानीमा मात्र खोप दिन उचित रहेको छ । कस्ता मानिसलाई चिकित्सकको विशेष सल्लाह वा निगरानी चाहिन्छ त ? यहाँ प्रस्तुत गरिएको छ :
एलर्जीको समस्या भएका मानिस
अमेरिकाको रोग नियन्त्रण तथा रोकथाम केन्द्र (सीडीसी)का अनुसार फाइजर र मोर्नाले निर्माण गरेको खोप लगाएपछि गम्भीर किसिमको एलर्जी भएको पनि पाइएको छ । अलिअलि असर पर्नु सामान्य भएपनि एनाफिलेक्सिस (लगातार चिलाउने, घाँटी सुन्निने, श्वास लिन गाह्रो हुने, बान्ता हुने लगायतका लक्षण देखा पर्छ) जस्तो एलर्जी घातक हुने विज्ञहरूको भनाइ रहेको छ ।
त्यसैले सीडीसीले कसैलाई फाइजर र मोडर्नाको खोपमा प्रयोग गरिएको केमिकलबाट एलर्जी हुने किसिमको मानिसमा खोप प्रयोग नगर्न सल्लाह दिएको छ । यसैगरी कुनै खोप लगाएपछि एलर्जी हुने व्यक्तिमा पनि यी खोप प्रयोग गर्नुपहिले चिकित्सकसँग विशेष सल्लाह लिन जरुरी भएको बताइएको छ ।
गर्भवती र दूध चुसाउने महिला
गर्भवती र बच्चालाई दूध चुसाउने महिलाले कोरोना खोप दिनु पहिले चिकित्सकसँग विशेष सल्लाह लिनुपर्ने जरुरी हुने बताइएको छ । गर्भवती महिलामा कोरोना खोपको साइड इफेक्ट कस्तो पर्छ भन्ने कुरा अहिलेसम्म परीक्षण गरिएको छैन । कोरोना खोपको परीक्षण गर्दा गर्भवती महिलामा नगरिएकाले अहिलेसम्म त्यस्ता महिलामा हुने असर पत्ता नलागेको हो ।
अमेरिकी विज्ञहरूले गर्भवती महिलालाई कोरोना संक्रमण भएमा गम्भीर असर हुने खतरा रहेको बताएका छन् । जसका कारण जन्मिने शिशुमा समेत गम्भीर खतरा हुन सक्छ । सामान्य अवस्थामा पनि गर्भवती महिलालाई अनावश्यक औषधी प्रयोग नगर्न चिकित्सकले सल्लाह दिने गरेका छन् । तैपनि खोप दिँदा भने कोरोनाबाट बचाउने त निश्चित छ । त्यसैले खोप दिनुअघि विज्ञ चिकित्सकको विशेष सल्लाहको आवश्यक पर्छ ।
कोरोना संक्रमित मानिस
कोरोना संक्रमित मानिसलाई खोप दिन उपयुक्त हुँदैन । उनीहरू कोरोनाबाट पूर्ण मुक्त भइसकेपछि मात्र खोप दिनुपर्छ । एन्टिबडी थेरापी लिने मानिसलाई ३ महिनापछि मात्र खोप दिन उपयुक्त हुने सीडीसीले उल्लेख गरेको छ ।
साना बच्चा
साना बच्चालाई कोरोना खोप दिन नहुने बताइएको छ । मोडर्नाको खोप १८ वर्षभन्दा माथिकालाई मात्र दिन मिल्ने बताइएको छ । त्यस्तै फाइजरको १६ भन्दा माथि र कोभ्याक्सिनको खोप १२ वर्षभन्दा माथिकालाई मात्र दिन मिल्ने उल्लेख गरिएको छ ।
तपाईँको अभिमत