बालकको आँखामा छिरेको छडी बीपी प्रतिष्ठानमा जटिल शल्यक्रिया गरी निकालियो

बीपी कोइराला स्वास्थ्य विज्ञान प्रतिष्ठान धरानमा बालकको आँखामा छिरेको छडी जटिल शल्यक्रिया गरी निकालिएको छ । गत फागुन ७ गते उक्त शल्यक्रिया गरिएको प्रतिष्ठानका सह–प्रवक्ता डा.अरुण कुमार सिंहले जानकारी दिनुभयो । 

डा.सिंहका अनुसार इटहरीका ५ वर्षीय आवाज श्रेष्ठको पिङ खेल्ने क्रममा लडेर आँखामा दाहिने आँखाका गेडीको माथिल्लो भागबाट काठको छडी भित्र छिरेको थियो ।

सुरुमा विराटनगरको एक अस्पताल लगिएको थियो । त्यहाँबाट रिफर भएर बीपी प्रतिष्ठानमा आइपुग्दा घटना भएको ९ घण्टा बितिसकेको थियो ।  प्रतिष्ठानको इमेर्जेन्सीमा ल्याउँदा बालक अचेत अवस्थामा थिए भने छडी छिरेको ठाउँबाट रक्तश्राव भइरहेको थियो। 

तुरुन्त आवश्यक जाँचहरु गरेर अप्रेसनका लागि लगियो । सर्जरी विभाग, आँखा विभाग र एनेस्थेसिया विभागको टोली मिलेर शल्यक्रिया गरिएको डा.सिंहले जानकारी दिनुभयो । 

सर्जरी विभागका न्यूरो सर्जन डा.आलोक दाहालको नेतृत्वमा शल्यक्रिया गरिएको हो । 

शल्यक्रियापछि ३ दिन आइसीयूमा राखिएको थियो । अवस्था सुधार हुँदै गएपछि वार्डमा सारियो । वार्डमा १० दिन राखेर डिस्चार्ज गरिएको थियो । 

बालकले आँखा देख्न सक्ने भएको र अन्य स्वास्थ्य अवस्था पनि सामान्य बन्दै गएपछि डिस्चार्ज गरिएको डा.सिंहले बताउनुभयो ।