नर्स कुमालमाथि कुटपिटको कारण खुल्यो, शारीरिकसँगै मानसिक तनाव

तनहुँमा नर्समाथि आक्रमण गर्नुको कारण खुलेको छ । तनहुँको व्यास नगरपालिका–८ गजुरेस्थित स्वास्थ्य चौकीमा कार्यरत नर्स (अनमी) प्रजापती कुमालमाथि जेठ २५ गते बिहान कुटपिट भएको थियो ।  सोही ठाउँकी अश्विना थापा गोदारले प्रजापती बस्दै आएको स्वास्थ्य चौकीको क्वाटरमै पुगेर कुटपिट गरेकी थिइन् । 

नर्स  प्रजापतीले आफ्नो पतिसँग बाेलचाल गरेकाे मन नपरी गोदारले कुटपिट गरेको खुल्न आएको छ । प्रजापति अहिले अस्पतालबाट डिस्चार्ज भएर पोखरा महानगरपालिका–२७ स्थित आफ्नो घरमा स्वास्थ्यलाभ गर्दै हुनुहुन्छ । प्रजापतिले हेल्थपाटीलाई दिएको जानकारी अनुसार आफ्नो पतिसँग कुरा गरेकाे मन नपराएर अश्विनाले कुटपिट गरेकी हुन्। 

उनकी सासू धर्मराजकी आमा बिरामी भइरहनुहुन्छ । धर्मराजकी आमा स्वास्थ्यचौकी नजिकै बस्नुहुन्छ । आमाले आफ्नो स्वास्थ्यबारे नर्स प्रजापतिसँग परामर्श लिइरहनुहुन्छ । आमाले प्रजापतिलाई  बेलाबेला बारीका फलेका तरकारी पनि दिने गर्नुहुन्थ्यो । 

आमाको स्वास्थ्य अवस्थाबारे आफूले धर्मराजलाई बेलाबेलामा जानकारी दिने गरेकाे नर्स प्रजापतिले सुनाउनुभयो । कुटपिट भएको अघिल्लो दिन बेलुका ८ बजेतिर धर्मराज र प्रजापतिबीच फेसबुक मेसेन्जरमार्फत कुराकानी भएको थियो । एकछिन कुरा गरेपछि प्रजापतिले भोलि कुरा गरौँला भनेर वाइफाइ अफ गरेर सुत्नुभयो । 

भोलिपल्ट बिहानै आएर अश्विनाले केही नभनी एक्कासी कुटपिट सुरु गरिन्। श्रीमान्सँग बोलेकै आधारमा अश्विनाले आक्रमण गरेको उहाँको गुनासो छ । 

एक स्थानियका अनुसार अश्विना झगडालु स्वभावकी हुनुन्छ । गाउँमा उनकाे अन्य महिलासँग पनि झगडा परिरहन्छ । उनी कुटपिटमा उत्रिहाल्ने गर्छिन् । 

कुटपिटपछि प्रजापतिलाई उपचारका लागि दमौली अस्पतालमा उपचारको लागि भर्ना गरिएको थियो । स्वास्थ्य अवस्था थप बिग्रिएपछि पश्चिमाञ्चल क्षेत्रीय अस्पताल पोखरा रिफर गरिएको थियो ।

• नर्स पिट्ने दोषीलाई कारबाही नगर्न दबाब, पीडित थप तनावमा
• नर्स कुटपिट गर्नेलाई कडा कारबाही गर्न गाेनानको माग
• कुटाइ खाने नर्सको स्वास्थ्य थप बिग्रिएपछि पोखरा लगियो
• एका बहानै क्वाटरमा छिरेर नर्समाथि कुटपिट

अस्पतालबाट डिस्चार्ज भएपनि प्रजापति पूरै निको भइसक्नुभएको छैन । शरीरका चोट निको हुँदै गर्दा उहाँ मानसिक तनावमा हुनुहुन्छ । कुटपिटसँगै अश्विनाले आफ्नो चरित्र हत्या गर्ने प्रयास गरेकाले उहाँ चिन्तित हुनुहुन्छ ।  उहाँ एक्लै हुँदा टोलाउने, कसैको फोन आउदाँ साह्रै डराउने, कराउने, रुने गर्नुहुन्छ । 

पीडित नर्सको घरमा जाँदा आमाबाबा लगायत सबै पीरमा देखिनुहुन्छ ।
प्रजापतिका आमा भगवती छोरीलाई धन्न केही भएनछ भन्नुहुन्छ । ‘मेरो छोरीको बारेका कतैबाट केही नराम्रो सुन्नु परेको थिएन। बेक्कारमा कुटाइ खानुपर्यो।’ आमा भगवती भन्नुहुन्छ। छोरीलाई अनावश्यक लान्छना लगाएर निर्घात कुटपिट गर्ने अश्विनालाई कडा सजाय हुनुपर्ने माग उहाँको छ । 

गोदारलाई कुटपिट भएकै दिन प्रहरीले पक्राउ गरेको  थियो । २६ गते नै उनीविरुद्ध उजुरी गरिएको थियो । अहिले उजुरी फिर्ता लिन गोदार पक्षबाट दबाब आइरहेको प्रजापति बताउनुहुन्छ।