अब एन्टीजेन विधिबाट एकैपटक धेरैको कोरोना परीक्षण

काठमाडौं । स्वास्थ्य तथा जनसंख्या मन्त्रालयले कोरोना संक्रमण बढ्दै गएपछि एकैपटक धेरै जनाको कोरोना परीक्षण गर्न एन्टीजेन विधिलाई अवलम्बन गर्ने भएको छ । 

मन्त्रालयका प्रवक्ता प्रा.डा.जागेश्वर गौतमले एकै पटक ठूलो संख्यामा कोरोना परीक्षण गर्न एन्टीजेन टेस्ट सुरु गर्न लागेको जानकारी दिनुभयो । उहाँले कोरोना परीक्षण सम्बन्धमा बनेको नेशनल गाइडलाइन अनुसार एन्टीजेन परीक्षण गरिने बताउनुभयो ।

एन्टीजेन टेस्ट किटबाट मास स्क्रिनिङ गर्ने हो, यो विधिबाट आरटि पीसीआर भन्दा छिटो नतिजा आउँछ, तुरुन्तै रिपोर्ट चाहिएको अवस्थामा यस विधिबाट कोरोना परीक्षण गरिन्छ, जस्तो आकस्मिक शल्यक्रिया गर्नुपर्ने बिरामीको हकमा पनि लागू हुन्छ, प्रवक्ता गौतमले भन्नुभयो, 'थोरै समयमा धेरैको परीक्षण हुन्छ । '

एन्टीजेन परीक्षणमा यदि रिपोर्ट नेगेटिभ आए लक्षणका आधारमा पुन पीसीआर परीक्षण गरि आइसोलेसनमा राखिने उहाँले बताउनुभयो । 
एन्टीजेन परीक्षणबाट नेपालमा संक्रमणको अवस्था पत्ता लाग्ने ईपिडिमियोलोजी तथा रोग नियन्त्रण महाशाखा प्रमुख डा.वासुदेव पाण्डेले जानकारी दिनुभयो । 

एन्टीजेन परीक्षणमा रगतको नमुना लिइन्छ यसले भाइरसको सतहमा बस्ने प्रोटिनलाई पहिचान गर्छ । 'यसको मतलव शरीरमा भाइरस छ भने प्रोटिन देखाउँछ र यदि भाइरस छैन भने प्रोटिन देखाउँदैन', पाण्डेले भन्नुभयो, 'काेराेनाकाे उच्च जाेखिम समुह र स्थानकाे पहिचान गरी एन्टीजेन परीक्षण गरिनेछ, याे समग्र देशमा संक्रमणको अवस्था पत्ता लगाउन पनि सहयोगी हुनेछ ।' 

पीसीआर परीक्षणका लागि अत्याधुनिक ल्याबको आवश्यक पर्छ तर एन्टीजेनलाई पर्दैन । त्यसैले ल्याब नभएका स्थानमा यसको प्रभावकारिता धेरै रहेको विज्ञहरु बताउँछन् ।