स्वास्थ्य चौकीमा एमबीबीएस डाक्टर, तलब एक लाख
स्वास्थ्य चौकीमा एमबीबीएस डाक्टर आएपछि बैतडीको पुर्चौडी नगरपालिकाका स्थानीयले गाउँमा स्वास्थ्य सेवा पाउन थालेका छन् । पुर्चौडी स्थित हाट स्वास्थ्य चौकीमा अहिले ओपीडी सेवा, इमर्जेन्सी सेवा, डिजिटल एक्स–रे, अल्ट्रासाउन्ड, प्रयोगशाला र इसीजी सेवा उपलब्ध छ ।
स्वास्थ्य चौकीमा साउन महिनाबाट एमबीबीएस डाक्टर प्रकाश चौधरीलाई नगरपालिकाले स्वास्थ्यचौकीमा नियुक्ति दिएको थियो । डा.चौधरीले साउन ४ गतेबाट स्वास्थ्यचौकीमा ओपीडी सेवासहितका सेवा दिन सुरु गर्नुभएको थियो।
गाउँमै स्तरीय स्वास्थ्य सेवा पाएपछि स्थानीय खुसी भएको नगरप्रमुख दीपकबहादुर बम बताउनुहुन्छ। स्थानीय निर्वाचनको बेला गरेको बाचा अनुसार स्वास्थ्यचौकीमा एमबीबीएस डाक्टर नियुक्त गरेको बमले बताउनुभयो ।
नगरपालिकाले मासिक १ लाख तलब दिने गरी स्वास्थ्य चौकीमा एमबीबीएस डाक्टर नियुक्त गरेको हो ।
बैतडीकै डिलाशैनी गाउँपालिकाले पनि स्वास्थ्य चौकीमा एमबीबीएस डाक्टर राख्न आवेदन माग गरेको छ ।
तपाईँको अभिमत