संक्रमितको उपचार गर्दागर्दै नर्स प्रमिलाको आँखामा जटिल समस्या, सहयोगको अपिल

काठमाडौं । नेपालगञ्जस्थित भेरी अस्पतालको कोभिड वार्डमा कार्यरत नर्स प्रमिला अधिकारी, आँखाको स्नायु सम्वन्धि जटिल समस्या देखिएपछि हाल काठमाडौंस्थित अन्नपूर्ण न्यूरो अस्पतालमा उपचाररत हुनुहुन्छ ।  जानकी गाउँपालिका ३ की २७ वर्षकी अधिकारीलाई लेफ्ट अप्टिक नर्भ इन्फ्लामेटरी लिसनको समस्या देखिएको हो । यस्तो समस्या हुँदा बिरामीको आँखाको ज्योतीसमेत गुम्ने खतरा रहन्छ । उहाँको पनि एक आँखामा समस्या देखिएको छ । अर्काे आँखाको अवस्था सुधारोन्मुख छ । 

प्रमिलालाई पोष्ट कोभिडको शंका गरिएको छ । संक्रमितको उपचार गर्दागर्दै उहाँलाई पनि संक्रमण देखियो । उहाँलाई बैशाख १२ गते कोरोना संक्रमण पुष्टि भएको थियो । घरमै १४ दिन आइसोलेसनमा बसी कोरोना जित्न सफल हुनुभएकी उहाँ संक्रमितकै उपचारमा अस्पताल फर्कनुभयो । तर उहाँ फेरि बिरामी हुनुभयो । 

‘कोभिड भएको १० दिनमै बायाँ आँखाले मधुरो देख्न थाल्यो त्यसपछि मैले बाँकेकै भिजन आइ हस्पिटलमा जचाँए, आँखा सुख्खा भएको छ भनेर औषधि दिनुभयो त्यसपछि ४–५ दिनपछि मेरो आँखा पुरानै अवस्थामा फर्किएको थियो तर फेरी एक हप्तापछि मेरो आँखाको दृष्टि कम हुँदै गयो । उहाँले भन्नुभयो, म काठमाडौं आएको आज १६/१७ दिन भयो, अप्रेसन भएको १३ दिन । ’

आँखाको समस्या कम नभएपछि उहाँ डाक्टरको सल्लाहमा काठमाडौं तिलगंगा अस्पतालमा आउनुभयो । तर न्यूरोको समस्या हुनसक्छ भनी तिलगंगाले अन्नपूर्ण न्यूरो अस्पतालमा रिफर गर्यो  । केही रिपोर्टहरु आउन बाँकी रहेको र आर्थिक अभावका कारण त्यतिन्जेल अस्पतालमै भर्ना भएर बस्न नसक्ने स्थिति भएपछि अन्नपूर्णका डाक्टरहरुको सल्हामै उहाँ ३ दिन अगाडिमात्रै डिस्चार्ज हुनु भएको छ । उहाँ डाक्टरहरुको सम्पर्कमै हुनुहुन्छ । हाल प्रमिला दाजुहरुसँग काठमाडौंमै हुनुहुन्छ । 

उहाँका अनुसार अहिले बायाँ आँखाले केही पनि देख्दैन । आँखामा भएको समस्या के हो भन्ने एकीन भएको छैन । बायोप्सीका लागि नमुना दिल्ली पठाइएको र त्यसको रिपोर्ट आउन केही दिन लाग्ने डाक्टरहरुले बताउनुभएको प्रमिलाले जानकारी दिनुभयो । आफ्नो उपचारका लागि सहयोग गर्नुहुने सबैमा उहाँले कृतज्ञता व्यक्त गर्नुभएको छ । 

नर्सिङ संघ बाँकेकी अध्यक्ष लक्ष्मीकेसी ओलीले अग्रपंक्तिमा खटिई सेवा गदागर्दै बिरामी पर्नुभएकी नर्स प्रमिलाको उपचारमा सहयोग गर्न अपिल गर्नुभएको छ ।  संघले प्रमिलाको उपचारका लागि ५० हजार ४० रुपैंया संकलन गरि सहयोग गरेको छ । 

सहयोगका लागि

नाम : प्रमिला अधिकारी

खाता नंम्वर : ०२०५७५०९७९१०१००१

एनआइसि एसिया बैंक, नेपालगञ्ज शाखा ।