टाउको दुख्नुका यस्ता छन् कारण, कसरी बच्ने ?
काठमाडौं । कतिपय मानिस हरेक दिन टाउको दुखाइको समस्याबाट ग्रसित भइरहेका हुन्छन् । त्यस्तै कुनै न कुनै बेला अधिकांश मानिस टाउको दुखेको अनुभव गर्छन् । यो सामान्य जस्तै भइसकेको छ । कतिपय अवस्थामा गम्भीर रोगका कारण पनि टाउको दुख्न सक्छ । यहाँ टाउको दुख्नुका कारणबारे बुझौँ ।
आँखाको समस्या
कतिपय बेला कुनै पनि चिज वा वस्तु निरन्तर एकटकले हेरिरहनाले पनि टाउको दुख्ने गर्छ । टाढाको वस्तु हेर्ने क्षमता भएका मानिसले नजिकको चिज एकटकले हेर्दा आँखामा चाप÷दबाब पर्न जान्छ । जसका कारण टाउको दुख्ने हुन्छ । सामान्यतः यो समस्या ४० उमेर पुगेका मानिसमा हुने गर्छ तर अहिले यी उमेर समूहका मानिसलाई मात्र नभएर सबै उमेर समूहका मानिसमा यो समस्या हुने गरेको छ । त्यसैले बेलाबेला आँखाको जाँच गर्न जरुरी हुन्छ ।
गर्दन तथा काँधमा हुने दबाब
गर्दन तथा काँधमा हुने चाप वा दबाबले पनि टाउको दुख्छ । कतिपय मानिस धेरै लामो समयसम्म कम्प्युटर हेर्ने गर्छन् । जसले गर्दन र आँखामा दबाब पर्छ । त्यस्तै कतिपय मानिस टाउकोले काँधमा मोबाइल च्यापेर घन्टौँसम्म कुरा गर्छन् । यसले पनि टाउको दुख्ने गर्छ । यस्तो हुँदा व्यायाम तथा मन तातो पानीले नुहाउने र आराम गर्नाले सञ्चो हुन्छ ।
भोक लाग्नु
कतिपय मानिसलाई लामो समयसम्म भोक खपेर बस्ने बानी हुन्छ । जसकारण टाउको दुख्न थाल्छ । लामो समयसम्म भोकै रहँदा ब्लड सुगर कम भएर जान्छ । त्यसैले टाउको दुख्ने गर्छ । भोकै बस्दा टाउको दुख्ने समस्या भएकाले छिनछिनमा केही न केही खाएमा यस्तो समस्या हुँदैन ।
बिहानको कफी नपिउनाले टाउको दुख्छ
यदि कसैमा बिहानै कफी पिउने बानी परेको छ भने कुनै दिन नपिउँदा टाउको दुख्न सक्छ । कफीको समस्याबाट मुक्त हनुलाई बिस्तारै कफीको मात्रा घटाउँदै लानुपर्छ वा कफीको सट्टा ग्रिन टी पिउँनुपर्छ ।
धेरै मदिरा पिउँदा टाउको दुख्ने गर्छ
धेरै मात्रामा मदिरा पिउनाले पनि टाउको दुख्ने गर्छ । ‘धङधङगी’ का कारण टाउको दुख्छ । पुरुषमा ५–८ प्याक पिउँदा यस्तो समस्या आउँछ भने महिलामा ३–५ प्याकले यस्तो समस्या निम्त्याउँछ । त्यसैले धेरै मात्रामा मदिार पिउनु हुँदैन ।
आइसक्रिमका कारण
आइसक्रिम खाँदा पनि टाउको दुख्ने समस्या हुन्छ भन्दा तपाईँलाई पत्यार नलाग्न सक्छ । तर यो कुरा सही हो । जब चिसो पदार्थ खाइन्छ, तब मुखका कोसिकाहरू सुक्न थाल्छन् जसका कारण टाउको दुख्न थाल्छ । यस्तो समस्या केही समयको लागि कायम रहन्छ । यसबाट बच्न चिसो पदार्थ कम खाने गर्नुपर्छ ।
कानको संक्रमण
कानमा कुनै किटाणु वा भाइरस संक्रमण भएमा पनि टाउको दुख्ने हुन्छ । तपाईँको कानमा तरल पदार्थ बन्ने समस्या हुन थाले तुरुन्त चिकित्सकसँग परामर्श लिनुहोस् ।
सुताइमा समस्या
गलत आसनमा सुताइ वा ओढ्ने लुगाको कमी भएमा टाउको दुख्ने समस्या हुन्छ । गलत आसन हुने, निदाउन समस्या हुने वा कम न्यानो भएमा तपाईँको निद्रा पुग्दैन । त्यसैले टाउको दुख्ने समस्या हुन्छ । त्यसैले शिर सीधा पारेर सुत्न मिल्ने गरी सुत्ने, प्रर्याप्त ओढ्ने जस्ता कार्य गरेमा यस्तो समस्याबाट बच्न सकिन्छ ।
तपाईँको अभिमत