डा.केसीसँग सहमति : नेतृत्वमा अन्य स्वास्थ्य विज्ञलाई उपेक्षा

चिकित्सा शिक्षा र स्वास्थ्यका विभिन्न माग राखेर आमरण अनशनमा बस्नुभएको डा.गोविन्द केसीले अनशन तोड्नुभएको छ । 

शनिबार डा.केसी र सरकारी प्रतिनिधिबीच १० बुँदे सहमति भएपछि साँझ केसीले अनशन तोड्नुभएको हो । 

डा.केसीको माग पूरा गर्ने सवालमा सरकारले अन्य विधाका स्वास्थ्यकर्मीलाई उपेक्षा गर्ने खालको सहमति गरेको छ।

डाक्टर कार्यरत रहने सबै सरकारी स्वास्थ्य संस्थाको नेतृत्वमा डाक्टर रहनुपर्ने माग डा.केसीको थियो ।  

डा.केसीले उठाउनु भएको माग अनुसार चिकित्सक कार्यरत संस्थाको नेतृत्व चिकित्सकले नै गर्ने व्यवस्था गर्न स्वास्थ्य मन्त्रालयले पत्राचार गर्ने भएको छ। 

केसीको यो मागमा विषयमा अन्य विधाका स्वास्थ्यकर्मीहरुको आपत्ति रहँदै आएको थियो।

सहिमतिको बुँदा नम्बर (ठ) मा चिकित्सक कार्यरत सबै स्वास्थ्य संस्थाहरूको नेतृत्व चिकित्सकले नै गर्ने व्यवस्था गर्न स्वास्थ्य तथा जनसङ्ख्या मन्त्रालयले परिपत्र गर्ने भनी उल्लेख गरिएको छ । 

स्वास्थ्य क्षेत्रमा डा.बाहेक अन्य विधाका स्वास्थ्यकर्मी ९२ प्रतिशत रहेको तर डाक्टरलाई मात्रै महत्व दिइएको आरोप अन्य विधाका स्वास्थ्यकर्मीहरुको थियो । 

यसअघि पनि डा.केसी अनशनमा बसेका बेला उहाँको माग पूरा गर्नेमा मात्रै ध्यान दिँदा सरकारले स्वास्थ्य क्षेत्रका अन्य जनशक्तिलाई निषेधको नीति लिएको आरोप लाग्दै आएको छ । 

स्वास्थ्य सम्बन्धी अन्य व्यवस्थापकीय कार्य गर्ने संस्थाको नेतृत्वमा समेत डाक्टरनै हुनुपर्ने माग उपयुक्त नभएको भनाइ अन्य विधाका स्वास्थ्यकर्मीहरुको छ । 

डा.केसीको पहलमा निर्माण भएको चिकित्सा शिक्षा आयोगमा समेत डाक्टरबाहेकका स्वास्थ्य विज्ञलाई निषेध गरिएको आरोप छ

डा.केसीले राख्नुभएका अन्य मागमा तोकिएको दरबन्दीअनुसार चिकित्सक खटाउने सहमति भएको छ। 

यस्तै स्थानीय तहले निःशुल्क खरिद गर्नुपर्ने औषधिहरू प्रकृया पुर्‍याएर खरिद गर्ने विषयमा पनि सहमति भएको छ। गेटा मेडिकल कलेज सञ्चालनका लागि आवश्यक कार्य अघि बढिसकेको जानकारी सहमतिमा गरिएको छ । 

इलामा पाँचथर, उदयपुरमा मेडिकल कलेज स्थापनाका लागि सम्भाव्यता अध्ययन गर्ने सहमति भएको छ । 

प्रतिष्ठानहरुमा पदाधिकारी नियुक्ति गर्दा निश्चित मापदण्डअनुसार गर्ने पनि सहमतिमा उल्लेख छ । 

डा.केसी धनगढीमा पुगेर भदौ २७ गतेदेखि २०औँ पटक अनशनमा बस्नुभएको थियो । बिहीबार उहाँको काठमाडौँ आउनुभएको थियो ।त्रिवि शिक्षण अस्पतालमा रहनुभएका डा.केसीले १३औँ दिनमा अनशन तोड्नुभएको हो ।

डा.केसी र सरकारबीच भएको सहमति