३ प्रदेशमा बिहानै परिरहेको छ पानी, दिउँसो र राति कहाँ-कहाँ पर्छ ?

अघिल्लो साता नेपाल भित्रिएको मनसुन बिस्तारै पूर्वबाट मध्यतिर प्रवेश गरिरहेको जल तथा मौसम विज्ञान विभाग मौसम पूर्वानुमान महाशाखाले जानकारी दिएको छ । 

महाशाखाका अनुसार अहिले देशका पूर्वी भागमा मनसुनी प्रणालीको प्रभाव रहेको छ ।  बाँकी भू-भागमा स्थानीय वायु, पश्चिमी वायु तथा भारतको विहार आसपास रहेको न्यून चापीय  क्षेत्रको आंशिक प्रभाव छ।

 अहिले बिहान कोशी र मधेश प्रदेशमा साधारणतया बदली, गण्डकी र बागमती प्रदेशमा आंशिकदेखि साधारणतया बदली रहनेछ । बाँकी  भू-भागमा आंशिक बदली रहेको छ। कोशी प्रदेशका केही स्थानमा तथा मधेश र बाग्मती  प्रदेशका थोरै स्थानमा मेघगर्जन तथा चट्याङसहित हल्का वर्षा भइरहेको छ।

आज कोशी, मधेश, बागमती र गण्डकी प्रदेशमा आंशिक देखि साधारणतया बदली रही बाँकी भू-भागमा आंशिक बदलीदेखि मौसम मुख्यतया सफा रहने छ। कोशी, बागमती र गण्डकी प्रदेशका केही स्थानमा तथा मधेश प्रदेश लगायत बाँकी भू-भागका एक-दुई स्थानमा मेघगर्जन तथा चट्याङसहित हल्का देखि मध्यम वर्षाको सम्भावना छ। 

आज राति कोशी, मधेश, बागमती र गण्डकी प्रदेशमा आंशिक देखि साधारणतया बदली  तथा बाँकी भू-भागमा आंशिक देखी  मौसम मुख्यतया सफा रहने छ। कोशी र मधेश प्रदेश लगायत बागमती र गण्डकी प्रदेशका पहाडी भू-भागका थोरै स्थानमा तथा बाँकी भू-भागका एक-दुई स्थानमा  मेघगर्जन तथा चट्याङसहित हल्का देखि मध्यम वर्षाको सम्भावना छ।