म मात्रै होइन सबै पर्वतबासी मन्त्री भएका हौँ : स्वास्थ्य मन्त्री गिरी
हेल्थपाटी - माघ १२, २०७९ ०७:४० मा प्रकाशित
अ +
अ -
स्वास्थ्य तथा जनसंख्या मन्त्री पदम गिरीले स्वास्थ्य क्षेत्रका समस्याहरुको पहिचान गर्दै परिवर्तनको प्रत्याभूति दिलाउने बताउनुभएको छ।
कुश्मा बजारमा आयोजित सातौं पर्वत महोत्सवको उद्घाटन गर्दै उहाँले अहिले स्वास्थ्य क्षेत्रका विद्यमान समस्याबारे गहिरोगरी अध्ययन गरिरहेको जानकारी दिनुभयो।
ती समस्या पहिचान गरेर जनतालाई भिन्नताको महसुस गराउने वाचा मन्त्री गिरीले गर्नुभयो। उहाँले पर्वत जिल्लाका सातवटै स्थानीय तहमा आगामी ५ वर्षभित्र सुविधासम्पन्न अस्पताल खोल्ने घोषणा पनि गर्नुभयो।
‘यहाँको जिल्ला अस्पतालमा अत्यावश्यक उपकरणहरूको कमी रहेछ' मन्त्री गिरीले भन्नुभयो, 'हामीले केही उपकरण अहिल्यै हस्तान्तरण गर्दैछौँ'।आगामी ५ वर्षभित्र सातवटै पालिकामा अस्पताल हुन्छन्, डाक्टर, नर्स र ल्याब हुनेछ।सानोतिनो शल्यक्रिया पनि हुन्छ।'
कोही पनि उपचार नपाएर मर्ने अवस्था नरहने दावी मन्त्री गिरीले गर्नुभयो। ‘फेरि स्वास्थ्य मन्त्रीले आफ्नो जिल्लाको मात्रै हेर्यो भन्ने पर्ला। तर त्यस्तो होइन। ताप्लेजुङदेखि दार्चुलासम्मका समस्या पहिचान गरेर स्वास्थ्य क्षेत्रमा सुधार ल्याउनेछौँ।'
गुणस्तरीय स्वास्थ्यको पहुँच सबै जनतामा पुर्याउने जिम्मा सरकारको भएको भन्दै उहाँले उपचार नपाएर अकालमा मर्नुपर्दैन भन्ने प्रत्याभूति जनतालाई दिलाउने गरी काम गर्ने बाचा गर्नुभयो।
प्रजातन्त्र प्राप्तिपछि मुलुकले पर्वत जिल्लाबाट प्रतिनिधित्व गर्ने पहिलो क्याबिनेट मन्त्री पाएको मन्त्री गिरीले बताउनुभयो।
६०-७० वर्षको अवधिमा पर्वत जिल्लाले कुनै मन्त्री नपाएको भन्दै उहाँले आफूलाई मतदान गर्ने मतदातालाई धन्यावाद दिनुभयो।
'हामी कति अभागी रहेछौँ वर्षौं भोट हाल्यौँ तर मन्त्री कोही बनेन' स्वास्थ्य मन्त्री गिरीले भन्नुभयो, 'तर आज एउटा इतिहास बनेको छ।
म सबैलाई कृतज्ञता व्यक्त गर्न चाहन्छु। यो पदम गिरी मात्रै होइन, हामी सबै पर्वतवासी मन्त्री भएका हौँ।'
'इतिहासले बारम्बार अवसर दिदैँन, थोरै समय अवसर दिन्छ। इतिहासमा दर्ज हुनेगरी काम गरेर देखाउने अवसर रहेको मन्त्री गिरीले बताउनुभयो।
तपाईँको अभिमत