कोरोनाकाे खोप मान्छेलाई परीक्षण गर्दा कस्ताे असर गर्छ ?

लन्डन । बेलायत सरकारले कोरोना भाइरसविरुद्धको खोप विकासलाई तीव्र गर्न मानव चुनौती परीक्षण योजना बनाएपछि स्वयमसेवकलाई संक्रमित पार्ने तयारी गरिएको छ । 

मानव चुनौती परीक्षण खोप विकासका लागि छरितो बाटोका रूपमा लिइन्छ । तर यस्ता परीक्षणले तीव्र खोप विकाससँगै ठूला जोखिमहरू पनि एकसाथ ल्याउँछन् । यो विधि सयौँ वर्ष पहिलेदेखि नै प्रयोगमा ल्याइएको हो । कतिपयले यो विधिले निकै चाँडो खोप विकास हुने बताइरहेका छन् भने कतिपयले नैतिक प्रश्न पनि उठाउने गरेका छन् ।

हाल कोरोना भाइरसविरुद्ध सयभन्दा बढी संस्थाले खोप विकास गरिरहेका छन् । तिनले यही छरितो बाटो अपनाएका छन् ।
के हो मानव चुनौती परीक्षण ?
बीबीसीमा प्रशारित एक रिपोर्टअनुसार खोप विकास गर्दा स्वस्थ मानिसमा यसको परीक्षण गर्नुपर्ने हुन्छ । त्यसका लागि उनीहरूमा पहिले भाइरस संक्रमण हुन जरुरी हुन्छ। मानव चुनौती परीक्षणमा सहभागीलाई पहिले संक्रमित बनाइन्छ ताकि खोप दिँदा कति सुरक्षित छ भन्ने कुरा थाहा होस् ।

यो परीक्षण फरक प्रकृतिको हो । यस परीक्षणमा सहभागी व्यक्तिमा प्राकृतिक बिरामी हुने समय कुर्नुपर्छ । यस परीक्षणमा सहभागी स्वस्थ कतिपयलाई खोप दिइन्छ भने कतिपयलाई दिइँदैन । त्यसपछि प्रत्येक व्यक्तिलाई भाइरस संक्रमण गराइन्छ ।

भाइरस संक्रमण गराएपछि त्यसका लक्षणअनुसार अन्य मानिसबाट टाढा राखिन्छ, ताकि भाइरस अरूमा नसरोस् । यस्तो गतिविधिलाई वैज्ञानिकले निगरानी गरिरहेका हुन्छन् । उनीहरू समय क्रममा खोपले काम गरे/नगरेको अध्ययन गर्छन् ।