माओवादी नेता वर्षमान पुनलाई थप उपचारका भोलि बैंकक लगिँदै
माओवादी केन्द्रका नेता तथा पूर्वमन्त्री वर्षमान पुनलाई उपचारका लागि बैंकक लगिने भएको छ । पुन निकट व्यक्तिहरुले दिएको जानकारी अनुसार बुधबार बिहान पुनलाई उपचारका लागि बैंकक लगिँदै छ ।
पुन लामो समयदेखि जण्डिस रोगबाट पीडित हुनुहुन्थ्यो । उहाँलाई जण्डिसको मात्रा बढेर र वान्ता हुने, ज्वरो आउने जस्ता समस्या देखिएको छ । अहिले पुनको उपचार ललितपुरस्थित सुमेरु अस्पतालमा भइरहेको छ ।
पुनको स्वास्थ्य अवस्थाबारे जानकारी लिन माओवादी अध्यक्ष पुष्पकमल दाहाल प्रचण्ड मंगलबार अस्पताल जानुभएको थियो । प्रचण्डको सल्लाहमा उहाँलाई थप उपचारका लागि बुधबार बिहानै बैंकक लान लागिएको हो ।
करिब दुई वर्षअघि पनि नेता पुन जण्डिसका कारण गम्भीर बिरामी पर्नुभएको थियो । उहाँलाई थाल्याण्डको बु्रमुङगार्ड अस्पतालमा उपचार गराइएको थियो ।
तपाईँको अभिमत