कोरोनाको नयाँ लक्षण : दाँत झर्ने समस्या
न्यूयोर्क । कोरोनो भाइरस (कोभिड–१९) को नयाँ लक्षण देखा परेको छ । न्यूयोर्क टाइम्सका अनुसार कोरोना भाइरस संक्रमितमा दाँत झर्ने नयाँ समस्या देखिएको हो । यो नयाँ लक्षणसँगै वैज्ञानिकहरू यस विषयमा थप अनुसन्धानमा जुटेका छन् ।
न्यूयोर्कका ४३ वर्षीय फराह खेमिलीमा यस्तो समस्या देखिएको थियो । उहाँले खाना खाएपछि खाइने ‘ब्रेथ मिन्ट’ खाएपछि दाँतमा अनौठो झट्का महसुस भएको बताउनुभयो ।
त्यसपछि उहाँले दाँत छामेर हेर्दा हल्लिरहेको र आफूले मिन्टकै कारण त्यस्तो समस्या भएको भन्ने लागेको बताउनुभयो । तर कारण मिन्ट नभएर अर्कै रहेको बताइएको छ । अर्को दिन सबेरै उहाँको दाँत झ¥यो । तर न त्यसमा दुखाई थियो न रगत नै आयो ।
खेमिली उक्त घटना हुनुभन्दा केही दिन पहिले कोभिड–१९ संक्रमित हुनुभएको थियो । उहाँले संक्रमण भएकै समयदेखि एक अनलाइनमा यस्तै किसिमका अनुभव बताइरहेका मानिसको फलो गरिरहनु भएको थियो ।
कोरोनाकै कारण दाँत खस्ने समस्या भएको भन्ने कुनै खास प्रमाण भने अहिलेसम्म फेला परेको छैन । तर सो अनलाइन ग्रुपमा आफ्नो अनुभव बताउने मानिसहरू पहिले कोरोना संक्रमित भएको पाइएको छ ।
कतिपय विशेषज्ञले कोभिड–१९ कै कारण यस्तो हुन सक्ने बताइरहनु भएको छ । युनिभर्सिटी अफ उटाहका डा. डेभिड ओकानोले अचनक दाँत खस्नु आश्चर्य भएको भन्दै यसको असर दूरगामी हुने बताउनुभयो । ‘कुनै व्यक्तिको दाँत अचानक बाहिर आउनु आश्चर्यजनक हो’, उहाँले भन्नुभयो, ‘दाँतसँग जोडिएको यो समस्या अरू भयंकर हुन सक्छ । यस समस्याबाट निको भएपनि यसको असर लामो समयसम्म रहन सक्छ ।’
त्यस्तै केही विज्ञले भने यस विषयमा थप अनुसन्धान गर्नुपर्नेमा जोड दिनुभएको छ । सन् २०१२ मा गरिएको एक शोधअनुसार ‘पेरिओडोन्टल डिजिज’ कारण पनि दाँत कमजोर हुने र दाँत खस्ने गर्दछ ।
खेमिलीको घटनामा पनि यस्तै अन्य कारण हुन सक्ने विज्ञहरूले बताएका छन् । उहाँमा दाँत दुख्ने समस्या पहिलेदेखि नै रहेको बताइएको छ । त्यस्तै उहाँले धुम्रपान गर्ने कारण पनि दाँतको आसपासका मांशपेसी कमजोर भएको र दाँत खसेको हुन सक्ने बताइएको छ ।
तर एक १२ वर्षीय बालकमा पनि कोरोना संक्रमणपछि दाँत खसेको घटना पाइएको छ । उहाँमा खेमिलीमा जस्तो पहिले कुनै दाँतको समस्या थिएन । साथै उहाँले सूर्तीजन्य पदार्थको सेवनसमेत गर्नुभएको थिएन ।
तपाईँको अभिमत