आपतकालीन प्रयोगमा ल्याइने औषधि वा खोपले नकारात्मक असर गर्दैन : स्वास्थ्यमन्त्री खापुङ (भिडियो)
विश्व स्वास्थ्य संगठनले आपतकालीन प्रयोगका लागि अनुमति दिएका खोपलाई मात्र नेपालमा प्रयोग अनुमति दिइने स्वास्थ्यमन्त्री भवानी खापुङले बताउनुभएको छ । राष्ट्रियसभाको आजको बैठकमा औषधि (तेस्रो संशोधन) विधेयक, २०७९ माथिको दफावार छलफलमा उठेका विषयमा जवाफ दिनुहुँदै उहाँले सो बताउनुभएको हो ।
उहाँले सम्बन्धित मुलुकको औषधि नियामक निकायले दर्ता गरेका र त्यस्ता निकायले आपत्कालीन प्रयोगको अनुमति दिएका खोप वा औषधिलाई नेपालमा दर्ता गरी सो खोप वा औषधिलाई आपत्कालीन प्रयोग गर्न दिने प्रयोजनका लागि ऐन ल्याइएको स्पष्ट पार्नुभयो ।
‘विश्व स्वास्थ्य संगठनले सूचीकृत गरेका, सम्बन्धित मुलुकको औषधि नियामक निकायले दर्ता गरेका र त्यस्ता निकायले आपतकालीन प्रयोगको अनुमति समेत प्रदान गरेका औषधि तथा खोपलाई नेपालमा दर्ता गरी सो औषधि वा खोपलाई आपतकालीन प्रयोगका लागि अनुमति दिने प्रयोजनको लागि यो ऐन ल्याइएको छ’, मन्त्री खापुङले भन्नुभयो, ‘विश्व स्वास्थ्य संगठनले प्रयोग अनुमति नदिएका कुनै पनि खोपलाई आपतकालीन प्रयोग गरिँदैन ।’
सम्बन्धित मुलुकमा परीक्षण गरी त्यहाँको नियामक निकायले समेत अनुमति दिएका औषधि वा खोपलाई मात्र नेपालमा प्रयोग अनुमति दिने भएकाले नकारात्मक असर गर्छ भनेर शंका नगर्न आग्रह समेत गर्नुभयो ।
औषधि (तेस्रो संशोधन) विधेयक, २०७९ माथिको दफावार छलफलमा भाग लिँदै सांसद डा. वेदुराम भुसाल र संयुक्त संशोधनकर्तामध्येबाट प्रकाश पन्थले नेपालमा खोप तथा औषधिको आपत्कालीन प्रयोग गर्न दिने विषय विधेयकमा रहेकाले ‘क्लिनिकल ट्रायल’ क्रममा कुनै व्यक्तिको शारीरिक तथा मानसिक रूपमा नकारात्मक असर गरेमा, अङ्गभङ्ग भएमा वा मृत्यु भएमा क्षतिपूर्ति दिने विषय समेटिनुपर्ने बताउनुभ भएको थियो ।
तपाईँको अभिमत