डा.किरण मृत्यु प्रकरण : आवासीय डाक्टर र अस्पताल प्रशासनबीच सहमति
पोखरा : पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पताल र प्रतिकात्मक विरोधमा रहेका आवासीय डाक्टरबीच सहमति भएको छ।
एमएस पहिलो वर्ष अध्ययनरत् आवसीय डाक्टर किरण श्रेष्ठको गत मंसिर २१ मा ड्यिुटीमा रहेको अवस्थामा मृत्यु भएको थियो ।
उहाँको मृत्युपछि अस्पतालमा रहेका आवासीय डाक्टरहरू विभिन्न १० बुँदे माग राख्दै विरोधमा उत्रिएका थिए ।
प्रतिष्ठानमा कालो ब्यानर राखेर विरोधमा उत्रिएका उनीहरुले राखेका मागहरु सर्तसहित पूरा हुने भएपछि विरोध कार्यक्रम स्थगित गरिएको छ ।
प्रतिष्ठानमा बन्दै गरेको पुस्तकालयको नाम डा. किरण श्रेष्ठको स्मृतिमा राखिनुपर्ने आवासीय डाक्टरहरुको मागलाई अस्पतालले पुरा गर्न नसक्ने बताएको थियो।
जसमा सहमति पछि अब सर्जरी विभागमा सुविधा सम्पन्न 'डा. किरण श्रेष्ठ स्मृति पुस्ताकलय' बनाउने सहमति भएको छ । साथै हरेक वर्ष डाक्टर किरणको सम्झनामा ‘मेमोरियल बेस्ट आवासीय अवार्ड’ को स्थापना गर्ने निर्णय भएको प्रतिष्ठानका आवासीय डक्टर्स वेल्फेअर सोसाइटी अध्यक्ष हिमलाल भण्डारीले जानकारी दिनुभयो ।
यस्तै आवासीय डाक्टर र स्वास्थ्यकर्मीको भविष्यमा हुन सक्ने आकस्मिक दुर्घटनालाई सम्बोधन गर्न विद्यार्थी र कर्मचारीको छुट्टाछुट्टै कल्याणकारी कोष बनाउने प्रशासनसँग सहमति भएको छ।
आवासीय डाक्टहरूका आवासका लागि आगामी आर्थिक वर्षमै बजेट व्यवस्था गर्न पहल गरिने सम्झौता भएको छ । यसअघि नै प्रतिष्ठानका उपकुलपति डुकबहादुर क्षेत्रीले पनि आवास निर्माणका लागि भारी रकम खर्च हुने भएकाले बजेट विनियोजनका पहल गर्ने बताउँदै आउनुभएको थियो।
सहमति अन्तरगत क्यान्टिनमा सबै स्वास्थ्यकर्मीहरूलाई १० प्रतिशत छुट, नागरिक बडापत्रको व्यवस्था र दर रेट र गुणस्तर अनुगमन गर्न आवासीय डाक्टर सम्मिलत समिति बनाउने र सोही समितिको सिफारिस अनुसार अगाडि बढ्ने सहमति भएको अध्यक्ष भण्डारीले बताउनुभयो ।
यस्तै आवासीय डाक्टरको सामाजिक सुरक्षाको मुद्दामा प्रतिष्ठानले सम्बन्धित निकायहरूमा पत्राचार गर्ने सम्झौतापछि हाललाई विरोधका कार्यक्रम स्थगित भएको हो।
पाँचथर स्थायी घर भएका २७ वर्षीय डाक्टर श्रेष्ठ केही समयदेखि नै बिरामी हुनुभएको थियो । बिरामी भएका समयमा नै ड्यिुटीमा खटिएका उहाँलाई असहज भएपछि अस्पताल नजिकै रहेको आफ्नो डेरामा पुग्नुभएको थियो । डेरामा पुग्नुभएका उहाँ अचेत अवस्थामा भेटेपछि आकस्मिक उपचारको क्रममा उहाँको असामायिक मृत्यु भएको थियो ।
श्रेष्ठ चिकित्सा शिक्षा आयोगमार्फत छात्रवृत्तिमा एमएस प्रथम वर्षमा अध्ययनरत हुनुहुन्थ्यो। श्रेष्ठको मृत्युपछि पोखरा स्वास्थ्य विज्ञान प्रतिष्ठानमा रहेका ७६ आवासीय डाक्टरहरुको समूह आवासीय डक्टर्स वेल्फेअर सोसाइटी पोखरा विरोधमा उत्रिएका थिए ।
तपाईँको अभिमत