अनियमित महिनावारी डिम्बाशय क्यान्सरको लक्षण हुनसक्छ, यस्ता छन् सुरुवाती लक्षण
सुरुवातमै डिम्बाशयमा हुने क्यान्सर पत्ता लगाउन सके उपचार गर्न सकिन्छ । क्यान्सर धेरैजसोले उत्तरार्ध स्टेजमा पुगेपछि मात्र थाहा पाउने गरेका छन् । त्यसले उपचारमा जटिलता हुने तथा रोग निको नहुने हुन्छ ।
डिम्बाशयमा हुने क्यान्सरबाट धेरैको ज्यान जाने गरेको छ । यो क्यान्सरबाट ज्यान जानेहरूमा पाँचौँ नम्बरमा पर्छ । यहाँ डिम्बाशयमा हुने क्यान्सरका केही सुरुवाती लक्षण प्रस्तुत गरिएको छ :
पेट फुल्ने : पेट फुल्ने समस्या सबभन्दा प्रमुख लक्षण हो । कसैले यसलाई मोटाएको भनेर बेवास्ता गर्ने गरेको पाइन्छ । साथै कतिपयले महिनावारी तथा खानपिनका कारण भएको बुझिरहेका हुन्छन् । तर त्यसो नभई डिम्बाशयको क्यान्सरले पनि पेट ठूलो हुने वा फुल्ने हुन्छ ।
थोरै खाँदा नै वाक्क हुने : खान मन नलाग्नु वा थोरै खाँदा नै वाक्क हुनु पनि डिम्बाशयको सुरुवाती लक्षण हो । खानुभन्दा पहिले धेरै खाने इच्छा हुने तर थोरै खानेबित्तिकै खान मन नलाग्ने समस्या हुनसक्छ । यसै कारण बिस्तारै महिलाको वजन घट्ने समस्या पनि हुन्छ ।
अपच हुने : वाक्क हुने समस्या बढ्दै गएमा अपच हुने समस्या पनि देखा पर्छ । यसले पेटमा असहज हुने हुन्छ । यसले कब्जियतलगायतका समस्या पनि निम्त्याउने अध्यताहरूले बताएका छन् ।
ढाड दुख्ने : कतिपयले दैनिक कार्यमा असहज हुने गरी ढाड दुख्ने समस्या भएको अनुभव गरेका छन् । डिम्बाशयको क्यान्सर हुँदा सुरुवातमा बस्न, उठ्नलगायत गर्न नसक्ने गरी ढाड दुख्ने समस्या हुने बताइएको छ । तर कतिपयले यसलाई अन्य कारणसँग मात्र जोडेर हेर्ने गरेको पाइन्छ ।
पिसाब निरन्तर लागिरहेको महसुस : कुनै बेला विभिन्न कारण बारम्बार पिसाब लाग्ने गर्छ । डिम्बाशयमा क्यान्सर हुँदा पनि निरन्तर पिसाब लागे जस्तो महसुस हुन्छ । अनि लामो समयसम्म पिसाब फेरिरहन मन लाग्ने विज्ञहरूले बताएका छन् ।
अनियमित महिनावारी : हरेक महिनाको चक्र अनियमित हुने समस्या पनि डिम्बाशयमा हुने क्यान्सरको लक्षण हो । कुनै बेला सामान्य भन्दा धेरै दिन रगत बगिरहने तथा महिनामा दुई पटक महिनावारी हुने समस्या हुन्छ ।
श्वास फेर्न गाह्रो : श्वास फेर्न गाह्रो हुने समस्या पनि धेरैलाई हुने गर्छ । विशेषगरी पल्टिएको बेला श्वास फेर्न असहज हुने गर्छ । क्यान्सर फैलिँदै गएपछि यस्तो समस्या हुने विज्ञहरूले बताएका छन् ।
तपाईँको अभिमत