करारका ६८ कर्मचारी कटौतीपछि टेकु अस्पतालका २१ आइसीयू बेड बन्द, खोप सेवा पनि बन्द हुने अवस्थामा
शुक्रराज ट्रपिकल तथा सरुवारोग अस्पताल टेकुमा कार्यरत ६८ करार कर्मचारीलाई एकैपटक हटाएपछि २१ आईसीयू बेड बन्द भएका छन् । कोरोना कालमा थपिएका २१ बेड आईसीयू बन्द भएका हुन् ।
कोरोनाअघि तीन बेड आइसियू र भेन्टिलेटर रहेकामा संक्रमितको चाप बढेसँगै २४ पुर्याइएको थियो । स्वास्थ्य तथा जनसंख्या मन्त्रालयले ३१ असारमा निर्णय गर्दै १ साउनदेखि करारका सबै कर्मचारी कटौती गरेपछि विगतमा दिँदै आइएको सेवा दिन सकस भएको अस्पतालका सूचना अधिकारी नवराज गौतमले बताउनुभयो ।
यसैगरी अन्य सेवा समेत प्रभावित भएको छ । पीसीआर सेवा पहिलेजस्तो दिन नसकिएको बताइएको छ । साथै रेबिजविरुद्धको इमुनोग्लोबुलिन भ्याक्सिन सेवा पनि बन्द भएको छ । यो भ्याक्सिन बिरामीमा गम्भीर घाउ भएको जटिल अवस्थामा दिइन्छ, जुन रेडिमेड एन्टिबडी हो । निजी अस्पतालले यो भ्याक्सिनका लागि एक लाखसम्म शुल्क लिन्छन् । कर्मचारी अभाव भएको भन्दै टेकु अस्पतालले मंगलबारदेखि कोरोनाविरुद्धको भ्याक्सिन सेवा पनि बन्द गर्नुपर्ने अवस्था आएको जनाएको छ ।
टेकु अस्पतालका अनुसार हटाइएका जनशक्तिमा तीन चिकित्सक, दुई रेडियोग्राफर, पाँच ल्याब टेक्निसियन, पाँच हेल्थ असिस्टेन्ट, एक नर्सिङ अधिकृत, १९ स्टार्फ नर्स, एक बायोमेडिकल टेक्निसियन, दुई सहचालक र ३० कार्यालय सहयोगी छन् ।
कोरोना बढ्दा स्थायी कर्मचारी अभावसँगै यी कर्मचारी भर्ना गरिएका थिए ।
(नयाँ पत्रिका दैनिकबाट)
तपाईँको अभिमत