कोरोना खोपकाे पहुँचमा छैनन् नर्सहरु

काठमाडौं । अन्तराष्ट्रिय नर्सिङ परिषद् (आइसिएन) ले विश्वका विभिन्न देशमा चलिरहेको कोरोना विरुद्धको खोप अभियानमा नर्सहरुलाई खोपमा असमान व्यवहार भएको भन्दै चिन्ता व्यक्त गरेको छ । 

आइसिएनले ५४ राष्ट्र तथा क्षेत्रमा गरेको सर्वेमा खोप आपूर्तिमा धनी र गरिब राष्ट्र बीच देखिएको ठुलो अन्तरले नर्सहरु मारमा पर्नुका साथै उनीहरुमाथि माथि विभेद भएको जनाएको छ । 

आइसिएनले ५४ राष्ट्रमध्ये ८८ प्रतिशत स्थानका नर्सहरुलाई खोप दिन सुरु गरेको भएपनि केही स्थानहरुमा खोप कार्यक्रम कहिले सुरुहुन्छ भन्ने टुंगो नलाग्दा नर्सहरु खोपबाट वञ्चित हुन परिरहेको बताएको छ । कम आय भएका देशमध्ये अफ्रिकामा अहिलेसम्म त्यहाँका नर्सलाई खोप दिइएको छैन । 

आइसिएनले उच्च र कम आय भएका देशहरुबीच खोपमा समान पहुँच हुन नसक्दा नयाँ प्रजातिका कोरोना फैलनेमा थप खतरा बढाएको चेतावनी दिएको छ ।

आइसिएनका प्रमुख कार्यकारी अधिकृत हाउवार्ड कटानले कोरोना भाइरस सक्रमणबाट २ हजार ७ सयभन्दा बढी नर्सको मृत्यु भएको भन्दै नर्सलाई खोप लगाउन ढिलाई भइरहेकोमा दुख व्यक्त गर्नुभयो ।