कोरोना खोप लगाएकाहरुमा एन्टीबडी बन्न थाल्यो
काठमाडौँ । नेपालमा कोरोना भाइरस विरुद्धको खोप लगाएकोहरुमा एन्टीबडी विकास हुँदै गएको पाइएको छ । माघ १४ गतेबाट सुरुभएको खोप अभियानमा अहिलेसम्म ४ लाख २९ हजार ७०५ जनाले खोप लगाइसकेको स्वास्थ्य मन्त्रालयले जनाएको छ । पहिलो मात्रा खोप लगाएको करिव एक महिनाको अवधिमा उनीहरुमा बिस्तारै एन्टीबडी बन्दै गएको पाइएको हो ।
बाल स्वास्थ्य तथा खोप शाखाका प्रमुख डा.झलक शर्मा गौतमले खोप लगाएकाहरुमा एन्टीबडीको विकास भइरहेको पाइएको जानकारी दिनुभयो । उहाँले खोप लगाएपछि केही डाक्टर र स्वास्थ्यकर्मीले एन्टीबडी परीक्षण गराउदा उहाँहरुमा एन्टीबडी बनेको पाइएको बताउनुभयो । यद्यपी नेपालमा खोपलगाएपछि शरीरमा बनेको कोभिड विरुद्धको एन्टीबडीबारे अध्ययन भने भएको छैन ।
शहीद शुक्रराज ट्रपिकल तथा सरुवा रोग अस्पताल टेकुका प्रमुख कन्सल्टेन्ट डा. अनुप बाँस्तोलाले खोपको पहिलो मात्रा लगाएको २८ दिनपछि आफुसहित केही स्वास्थ्यकर्मीको शरीरमा एन्टीबडी बन्ने प्रक्रिया सुरु भइसकेको जानकारी दिनुभयो । उहाँले खोप लगाएका १२ जनाको आरडिटि परीक्षण गर्दा उनीहरुमा एन्टीबडी बनेको पाइएको बताउनुभयो ।
फागुन २३ गतेबाट ५५ वर्षभन्दा माथिका व्यक्तिलाई खोप लगाइदैछ । यसअघि स्वास्थ्यकर्मी, सफाइकर्मी, शव व्यवस्थापक, एम्बुलेन्स चालक, महिला स्वास्थ्य स्वयम्सेविका, बैंकका कर्मचारी, सरकारी कर्मचारी, औषधि व्यवसायी लगायतलाई खोप लगाइसकिएको छ ।
तपाईँको अभिमत