देख्दा स्वस्थ र कम उमेरका व्यक्तिमा किन बढ्दैछ हृदयघातका समस्या ?, यस्ता छन् जान्नैपर्ने मुटुरोगका लक्षणहरू
मोटो व्यक्तिमा उच्च कोलेस्टेरोलको तह हुन सक्छ । उच्च कालेस्टेरोल हुँदा रक्तसञ्चार हुन नपाई हृदयघात लगायत मुटुसँग सम्बन्धित रोग लाग्न सक्छ ।
पछिल्लो समय साना उमेर तथा देख्दा स्वस्थ र फिट देखिने व्यक्तिमा पनि हृदयघात जस्ता रोगको बढिरहेको तथ्यांक छ । आखिर किन फिट देखिने र कम उमेरका मानिसमा हृदयघात बढिरहेको छ त ? प्रश्न खडा भएको छ ।
नेपाललगायत विश्वका धेरै चर्चित कलाकार र व्यक्तिहरूले तत्कालै भएको हृदयघातकै कारण ज्यान गुमाएका छन् । ४० देखि ५० उमेर समूहका ती कलकारले ज्यान गुमाएका हुन् । पहिले कुनै रोग देखा नपरेका ती कलाकारले एक्कासी ज्यान गुमाउन पुगेका हुन् ।
यस्ता घटनाले व्यक्तिको जीवनशैली कस्तो हुनुपर्छ भन्ने विषयमा गम्भीर प्रश्न उठाएका छन् । कलाकारहरूको काम गर्ने प्रकृति तथा प्रत्येक दिनको कार्यतालिकामा प्रश्न उब्जिएको छ ।
कम उमेरका व्यक्तिमा मुटुरोग हुँदैन भन्ने भ्रम
कम उमेरका व्यक्तिमा मुटुरोग हुँदैन भन्ने भ्रम पनि समाजमा विद्यमान रहेको छ । यो रोग पाका व्यक्तिमा मात्र हुन्छ भन्नु गलत हो । युवावस्थामा हृदयघात हुँदैन भन्ने भ्रमकै कारण पनि युवावस्थामा यसबारे कम चासो हुने गरेको छ ।
सत्य कुरा चाहिँ के हो भने शरीरका अङ्गहरूले उमेर र जीवनशैलीका आधारमा कार्य गरिरहेका हुन्छन् । एक २० वर्षीय व्यक्ति पनि खराब जीवनशैली छ भने ६० वर्ष उमेरका वृद्ध बराबर नै जोखिमयुक्त हुन्छ । सन् २०१९ मा हार्वड स्वास्थ्यमा गरिएको एक अध्ययनअनुसार धमनीमा अवरोध हुनेमध्ये ८० प्रतिशत वयस्क युवा थिए ।
उचित व्यायाम, तौल नियन्त्रण, सन्तुलित भोजन तथा सबै किसिमका जीवनशैली राम्रो गरेमा मुटुसँग सम्बन्धित रोग लाग्नबाट बच्न सकिन्छ ।
मुटुरोगका कारणहरू
सबभन्दा पहिलो कुरा जीवनशैली हो । जीवनशैली असल भएमा मुटुसँग सम्बन्धित रोगबाट जोगिन सकिन्छ । जीवनशैलीसँगै ध्यान दिनुपर्ने कुरा चाहिँ नियमित स्वास्थ्य जाँचमा हो । देख्दा स्वस्थ र फिट देखिने व्यक्तिको भित्र के भइरहेको बाहिरबाट देखिदैन । त्यसैले नियमित रूपमा स्वास्थ्य जाँच गर्न जरुरी छ ।
पछिल्लो समय ३५ देखि ४० वर्षका युवामा हृदयघात सामान्य हुँदै जानुको मुख्य कारण मोटोपन तथा उच्च रक्तचाप रहेको अमेरिकी रोग नियन्त्रण तथा रोकथाम केन्द्रले जनाएको छ । त्यसैले तौललाई नियन्त्रणमा राख्न विशेष ध्यान दिन विज्ञहरूले सुझाएका छन् ।
सबैले ध्यान दिनैपर्ने मुटुरोगका सङ्केत तथा लक्षणहरू
युवापुस्ताले आफ्नो मुटुको स्वास्थ्य बारे विशेष सजगता अपनाउनुपर्छ । मुटुसँग सम्बन्धित रोग लाग्दा पक्कै पनि केही सङ्केत तथा लक्षणहरू देखा पर्छन् । बेलैमा चिकित्सकीय सहयोग पाउन ती सङ्केत थाहा पाउन जरुरी छ:
– सामान्य शारिरीक क्रियाकलाप गर्न गाह्रो हुनु,
– तुलनात्मक रूपमा समकालिनहरू भन्दा बढी थकित हुनु,
– श्वास बढ्नु,
– बारम्बार चक्कर लाग्नु,
– धड्कन छिटोछिटो धड्केको महसुस हुनु,
– नियमित रूपमै बेहोस भएजस्तो अनुभव हुनु ।
(टाइम्स अफ इन्डियाबाट)
तपाईँको अभिमत