शाहको नियुक्तिमा गायब डा. केसी काफ्लेको नियुक्तिमा टुप्लुक्क

जुम्लामा रहनुभएका डा.गोविन्द केसीले त्रिवि शिक्षण अस्पतालको कार्यकारी निर्देशकमा प्रा.डा. दिनेश काफ्लेलाई नियुक्त गरिएको विषयमा आपत्ति जनाउनु भयो । अर्थोपेडिक सर्जन प्रा.डा.काफ्लेलाई त्रिवि कार्यकारी परिषदको भदौ २४ गतेको बैठकले शिक्षण अस्पतालको कार्यकारी निर्देशक नियुक्त गरेको थियो ।  
डा. केसीले भदौ २५ गते जुम्लाबाटै विज्ञप्ति जारी गर्दै यस कार्यको विरोध गर्नुभएको छ । 

‘म आईओएमबाट अवकाश लिए पनि यहाँभित्रका बेथिती, वरियता मिचेर हुने नियुक्ति जस्ता कार्यविरुद्ध आन्दोलन जारी राख्छु ।’

दलीय भागवण्डामा बरियता मिचेर यसरी नियुक्त गर्दा चिकित्साशास्त्र अध्यययन संस्थान (आईओएम) धरासायी बन्दै जाने डा. केसीको तर्क थियो । मेडिकल शिक्षा सुधार लगायत स्वास्थ्य क्षेत्रका विभिन्न माग राखेर पटक–पटक अनशन बसेर चर्चामा आउनु भएका व्यक्ति हुनुहुन्छ प्राध्यापक डा.गोविन्द केसी । डा. केसी र उहाँका गतिविधिको बारेमा धेरै चर्चा गरिरहनु नपर्ला किनकी धेरैले उहाँलाई चिनेका छन् । गतिविधिहरुलाई नियाली रहेका पनि छन् । 

डा. केसीका अभिव्यक्ति र क्रियाकपालहरु नेपालका अधिकांश सञ्चार माध्यमहरुका कभरेजको विषय बन्ने गरेको छ । गतसाल चिकित्साशास्त्र अध्यययन संस्थान(आईओएम)बाट अवकाश पाउनु भएका केसीले अवकाश लिएकै दिन घोषणा गर्नु भएको थियो कि ‘म आईओएमबाट अवकाश लिए पनि यहाँभित्रका बेथिती, वरियता मिचेर हुने नियुक्ति जस्ता कार्यविरुद्ध आन्दोलन जारी राख्छु ।’

डा.केसीको सत्याग्रह कुनै व्यक्तिलाई पदमा पुर्‍याउन वा कसैलाई रोक्नकै लागि थियो ?

केसीले बेला बेलामा विभिन्न माग राख्दै अनशन बस्ने घोषणा अवकाशपछि पनि गर्दै आउनु भएको छ । ३ महिना अगाडि चिकित्साशास्त्र अध्यययन संस्थान(आईओएम)को डीनमा  डा. दिव्यासिंह शाह नियुक्त हुनुभयो । डा. दिव्या डीनका लागि अयोग्य व्यक्ति त हैन तर उहाँ आईओएमका कार्यरत चिकित्सकको बरियतामा निकै पछाडि हुनुहुन्थ्यो । धेरै जना पछाडि भए पनि डा. दिव्याले नियुक्ति पाउनुको एउटै मात्र कारण थियो हालका प्रधानमन्त्रीसँग उहाँको निकटता । प्रधानमन्त्रीको निजी चिकित्सकसमेत रहनुभएकी उहाँलाई प्रधानमन्त्रीकै जोडबलमा डीनमा नियुक्त गरिएको जगजाहेर छ । 

न्यायका पक्षमा, स्वास्थ्य क्षेत्रको सुधारका पक्षमा रहेको भनी चर्चा कमाउनु भएका डा.केसी यसरी पूर्वाग्रही बन्न मिल्छ ?

त्यति बेला डा.केसी चुपचाप रहनु भयो । सुदूरपश्चिमतिर रहनु भएका केसीले यसबारे कहीँकतै केही बोलेको सुनिएन । कारण हो डीनमा नियुक्त हुनुभएकी डा.दिव्या केसीको निकट सहयोगी हुनुहुन्थ्यो । उहाँ डा.केसीको आन्दोलनको मुख्य खम्बा नै हुनुहुन्थ्यो । केसीको आन्दोलनको पक्षमा माहौल बनाउने, विज्ञप्ति जारी गर्ने, अनशनरत डा. केसीको अनसनकाे समयमा उहाँकाे उपचारलगाएतकाे सम्पुर्ण चाँजाेपाँजाे मिलाउन खटिने मुख्य पात्र डा.दिव्या नै हुनुहुन्थ्यो ।

केसीको सत्याग्रहको सुरुवात नै बरिष्ठताका आधारमा डीन नियुक्त हुनुपर्ने भन्ने विषयबाट भएको थियो । २०६९ असारमा अनशन बसी केसीले डा. कुमुदकुमार काफ्लेलाई आईओएमको डीनमा नियुक्त गराउन भूमिका खेल्नुभएको थियो । काफ्लेले एक महिनामै अवकास पाएपछि ३२ औं नम्बरमा रहनुभएका हालका त्रिवि उपकुलपति प्रा.डा. धर्मकान्त बाँस्कोटालाई २०६९ साल साउनमा डीन नियुक्त गरिएको थियो । यसैको विरोधमा केसी दोस्रो पटक अनसन बसेपछि बाँस्कोटा डीनबाट हट्न बाध्य हुनुभएको थियो । 

२०७० माघमा आईओएमको डीन नियुक्त हुनुभएका प्रा.डा. शशि शर्मालाई केसीले अनशन बसेर दवाव दिएकै कारण १३ औं दिनका दिन बर्खास्त गरिएको थियो । त्रिवि शिक्षण अस्पतालको निर्देशकमा केपी प्रा.डा.सिंह नियुक्त हुँदा पनि बरिष्ठताकै आधारमा हुनुपर्छ भनी केसी र उहाँका समर्थकले आन्दोलन चर्काएर डेढ महिनामा नै राजीनामा दिन बाध्य बनाइएको थियो ।

डा. दिव्याको नियुक्तिमा चुपचाप रहने अनि काफ्लेलाई नियुक्त गर्नेवित्तिकै चेतावनी दिन उत्रिनुको अभिप्राय के हाे ?

आफ्ना यिनै दृष्टान्तहरुलाई बिर्सेर डा.दिव्याको नियुक्तिमा गुमनाम रहनु भएका डा.केसी अहिले डा. काफ्लेको नियुक्तिमा टुप्लुक्क झुल्किनु भएको छ । यो नियुक्ति सरकारले आफूसँग पटक–पटक गरेको सहमति विपरीत रहेको बताउनु भएको छ । यस कार्यले आईओएम समस्यामा पर्ने दावी पनि उहाँले गर्नु भएको छ । यस्ता विषयहरु समेटेर निकट भविष्यमै सत्याग्रह सुरु गर्ने चेतावनी पनि उहाँले दिनुभएको छ । 

आईओएमकी डीन डा. दिव्या सिंह शाह सहितकै सिफारिसमा अस्पतालको कार्यकारी निर्देशकमा नियुक्त हुनुभएका प्रा.डा. काफ्ले बरियताका आधारमा दिव्याभन्दा अगाडि हुनुहुन्छ । डीनमा नियुक्तिका लागि पनि उहाँ चर्चामा हुनुहुन्थ्यो । न्यायका पक्षमा, स्वास्थ्य क्षेत्रको सुधारका पक्षमा रहेको भनी चर्चा कमाउनु भएका डा.केसी यसरी पूर्वाग्रही बन्न मिल्छ ? उहाँले गर्दै आएको सत्याग्रह आफूलाई मन नपरेका व्यक्तिको नियुक्ति हुँदा मात्रै हो ? डा. दिव्याको नियुक्तिमा चुपचाप रहने अनि काफ्लेलाई नियुक्त गर्नेवित्तिकै चेतावनी दिन उत्रिनुको अभिप्राय के हाे ?

यसको जवाफ डा.केसीले दिनुपर्छ कि पर्दैन ? हो, उहाँ सादगी व्यक्ति हुनुहुन्छ । उहाँका कुनै व्यक्तिगत स्वार्थ नहोलान् । नत्र भने कुन समूह वा व्यक्तिको स्वार्थ पूर्तिका लागि उहाँ प्रयोग भइरहनु भएको छ ? डा.केसीको अनशनका बेला उहाँका समर्थकद्वारा धेरै पटक सरकारी अस्पताल बन्द गरिएको थियो । त्यतिबेला उपचार नपाएर निजी अस्पतालमा पहुँच नभएका धेरै बिरामीले ज्यान गुमाएका छन् । डा.केसीकाे आदर्शहरु आफूलाई मन नपरेको व्यक्तिले नियुक्ति पाउँदा मात्रै प्रष्फुटन हुने हो ?