१९ थपिए संक्रमित, संख्या ६०३ पुग्यो : स्वास्थ्य मन्त्रालय
निको हुनेको संख्या बढ्दै
काठमाडौं । थप १९ जनामा कोरोना भाइरस रोगको पुष्टि भएको छ । काठमाडौं, नुवाकोट, रुपन्देही, कपिलवस्तु, गुल्मी, रौतहट,बारा र पर्सामा गरि आज १९ जनामा कोरोना भाइरस रोगको पुष्टि भएको हो ।
स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रवक्ता डा.विकास देवकोटाले काठमाडौं,नुवाकोट सहित विभिन्न स्थानमा गरि आज १९ जनामा संक्रमण देखिएको जानकारी दिनुभएको हो । नुवाकोटमा पनि संक्रमित देखिएपछि नेपालमा कोरोना संक्रमण ४२ जिल्लामा फैलिएको उहाँले बताउनुभयो ।
प्रवक्ता देवकोटाका अनुसार आज संक्रमण पुष्टि हुनेहरुमा काठमाडौं सोर्हखुट्टेका ६९ वर्षका एक पुरुष,नुवाकोट ककनीका ३९ वर्षका एक पुरुष,गुल्मी मदानेका ३१ वर्षका एक जना पुरुष,रुपन्देहीमा ६ जना जसमा गैडवाहाका २३, ३० र ४० वर्षका पुरुष,रुपन्देहीकै समाईमाईका ४० र ५० वर्षका पुरुष,रुपन्देही १ का ३२ वर्षका पुरुष सर्लाही हरिपुर ६ का ४८ वर्षका पुरुष,रौतहट स्थायी ठेगाना भई कैलालीमा कार्यरत ३० वर्षका पुरुष,पर्सा नागवाहका ६० वर्षका पुरुष,वीरगञ्ज पर्साका २५ वर्षका पुरुष,बारामा कार्यरत ३४ वर्षका पुरुष,कलैयाका ३३ वर्षका एक पुरुष,कपिलवस्तु खेरातीका ३ जना ३५,३४ र ५२ वर्षका पुरुष रहेका छन् ।
यो संगै नेपालमा संक्रमितको संख्या ६०३ रहेको छ जसमा पुरुषको संख्या ५२४ र महिलाको संख्या ७९ रहेको छ ।
संक्रमितको प्रादेशिक विवरण
प्रदेश नम्वर १ का ७ जिल्लामा ८६,प्रदेश नम्वर २ का आठ वटै जिल्लामा १७९,बागमती प्रदेशका ११ जिल्लामा ३४, गण्डकी प्रदेशमा ३ जिल्लामा ५, प्रदेश नम्वर ५मा ७ जिल्लामा २८१ , कर्णालीमा २ जिल्लामा गरि ४ र सुदुरपश्चिमका ४ जिल्ला गरि १४ जनामा संक्रमण पुष्टि भएको छ ।
निको हुनेको संख्या बढ्दै
आज नारायणी अस्पतालका ७ र धागो कारखाना बुटवलका १० गरि १७ जना डिस्चार्ज भएका छन् । यो संगै नेपालमा निको हुनेको संख्या ८७ पुगेको छ । जसको प्रादेशिक विवरण अनुसार प्रदेश नम्वर १ मा २६,प्रदेश नम्वर २ मा १३,प्रदेश बागमती प्रदेशमा ९,गण्डकी प्रदेशमा २,प्रदेश नम्वर ५ मा ३२ र सुदुरपश्चिममा ५ जना निको भएर घर गएका छन् । हालसम्म नेपालमा कोरोना संक्रमणका कारण ३ जनाको मृत्यु भएको छ ।
पछिल्लो २४ घण्टामा २ हजार ८५६ को पीसीआर परीक्षण
प्रवक्ता देवकोटाका अनुसार पछिल्लो २४ घण्टामा २ हजार ८५६ जनाको पीसीआर परीक्षण भएको छ । हालसम्म ४८ हजार ८१५ जनाको परीक्षण भएको छ भने र्यापिड डायग्नोष्टिक टेस्ट(आरडीटि) बाट ९० हजार २६ जनाको परीक्षण भयो । २४ घण्टामा ३ हजार ७९१ जनाले आरडीटिबाट परीक्षण गराए । आज देशभर ३९ हजार ४०१ ज्ना क्वारेन्टाइनमा बसिरहेका छन् ।
तपाईँको अभिमत