कोरोनाले २१ देशमा खोप अभाव,बालस्वास्थ्यकाे चिन्ता: विश्व स्वास्थ्य संगठन
काठमाडौं,१६ बैशाख । कोरोना भाइरस रोगको संक्रमण नियन्त्रणका लागि गरिएका प्रतिबन्धले अन्य रोग विरुद्धको खोपको अभाव देखिन थालेको छ । विश्व स्वास्थ्य संगठन (डब्ल्यूएचओ) ले कोरोना संक्रमणबाट बालबालिकाहरु कम जोखिम रहेपनि खोपबाट नियन्त्रित रोगको उच्च जोखिममा रहेको बताएको छ । डब्ल्यूएचओका महानिर्देशक डा.अधानोम टेड्रोसले संक्रमण नियन्त्रणका लागि सिमा बन्द गरिदा २१ वटा गरिव राष्ट्रले आफ्ना देशमा खोपको अभाव भएको रिपोर्ट गरिसकेको भन्दै यसले खोपबाट नियन्त्रित रोग बढ्दै जाने देखाएको बताउनुभयो ।
जेनेभामा नियमित प्रेस ब्रिफिङमा उहाँले उप–सहारा अफ्रिकामा मलेरियाका बिरामी दोब्बरले बढ्ने अवस्था रहेको बताउदै महानिर्देशक टेड्रोसले भन्नुभयो,कोरोना भाइरसको महामारी धेरै समय सम्म देखिनेछ त्यसैले नियन्त्रणका लागि सबै एक भएर लाग्नुपर्छ । अफ्रिका,पूर्वि यूरोप,ल्याटिन अमेरिका र केही एसियाका राष्ट्रहरुमा संक्रमण बढिरहेको छ,हामीले धेरै काम गर्नुछ । उहाँले इबोला विरुद्धको खोप विकासमा संगठनको मुख्य भुमिका रहेको भन्दै कोरोना भाइरस रोग विरुद्धको खोप विकासका लागि पनि उत्तिकै लागिरहेको बताउनुभयो ।
महानिर्देशक टेड्रोसले सोमबार प्रेस ब्रिफिङमा गर्नुभएको खोप सम्वन्धि सम्बोधनकाे अंश
यो हप्ता विश्व खोप हप्ता हो । विश्व स्वास्थ्यको इतिहासमा खोप एउटा सर्वाधिक सफल कार्यक्रम रहेको र खोपबाट २० भन्दा बढी रोगबाट बच्न सकिन्छ । प्रत्येक वर्ष ११ करोड ६० लाख शिशुले खोप पाउने गरेका छन् भने अझै पनि १ करोड ३० लाख बालबालिका खोपबाट छुटिरहेका छन् । कोरोना भाइरस रोगका कारण खोपको पहुँचबाट बाहिरिने बालबालिकाको संख्यामा वृद्धि हुनेछ ।
पोलियो रोग विरुद्धको खोप कार्यक्रम रोकिएका छन् । लकडाउनका कारण धेरै देशमा नियमित खोप समेत बन्द भएका छन् र सञ्चालित कार्यक्रम पनि प्रभावित भइरहेको छ । संक्रमणका डरले अभिभावकहरुले आफ्ना बालबालिकालाई खोप लगाउन जान सकेका छैनन् । अर्काे कुरा खोपका बारेमा हुने गरेका गलत सन्देश प्रवाहले आगोमा घ्यू थपिरहेको छ यसले विभिन्न रोगको जोखिम बढाएको छ । जब खोपको कभरेज कम हुँदै जान्छ दादुरा र पोलियो जस्ता प्राणघातक रोगको प्रकोप फैलन्छ ।
सिमा बन्दका कारण खोप गठबन्धन गाभीले अति कम र मध्यम आयस्रोत भएका विभिन्न २१ वटा देशमा खोपको अभाव भएको बताइसकेको छ । गाभीले पोलियो,दादुरा,मलेरिया,जण्डिस,मेनेन्जिाइटिस लगायतका १४ रोग विरुद्ध खोप अभियान चलाइरहेको छ जसबाट १ करोड ३० लाख मानिसले खोपको अवसर पाउनेछन् । तर अहिलेको खोप नपाईरहेको अवस्थाले बालबालिकाको मृत्युलाई बढाउँछ ।
सन् २००० देखि गाभिले विश्व स्वास्थ्य संगठन लगायत विभिन्न साझेदारी संस्थासंग मिलेर विश्वका गरिव राष्ट्रका ७६ करोड बालबालिकालाई खोप दिइरहेको छ जसबाट १ करोड ३० लाख बालबालिकालाई मृत्युबाट जोगाँउछ । गाभीले सन् २०२५ सम्ममा १८ वटा रोग विरुद्धका खोपबाट ३० करोड भन्दा बढी बालबालिकालाई जोगाउने लक्ष्य राखेको छ । यो लक्ष्य हासिल गर्न गाभिलाई ७ अर्ब ४० करोड अमेरिकी डलर आवश्यक पर्दछ ।
तपाईँको अभिमत