क्यालिफोर्निया लकडाउन, करिव ४ करोड मानिसलाई घरभित्रै बस्न निर्देशन
काठमाडौं, ७ चैत । अमेरिकाको क्यालिफोर्नियामा करिव ४ करोड मानिसलाई घरभित्रै बस्न निर्देशन दिइएको छ । कोरोना संक्रमण नियन्त्रणका लागि अमेरिकाले यस्तो निर्देशन जारी गरेको हो । गर्भनर गेभिन न्युजले क्यालिफोर्नियामा २५ लाख मानिसलाई असर गर्न सक्ने अनुमान रहेको जानकारी राष्ट्रपति डोनाल्ड ट्रम्पलाई दिनुभएको अन्तर्राष्ट्रिय सञ्चार माध्यमहरुले जनाएका छन् ।
यदि संक्रमण रोकिएन भने राज्यसँग थेग्न सक्ने अस्पताल नरहेको जानकारी पनि गर्भनर न्युजले राष्ट्रपति ट्रम्पलाई गराउनुभएको छ । उहाँले राष्ट्रपति ट्रम्पलाई पठाउनुभएको पत्रमा भन्नुभएको छ क्यालिफोर्नियामा ७८ हजार बेडको क्षमता रहेको छ । उत्तरी क्षेत्रको एक अस्पताल सरकारले अधिग्रहण गरिसकेको र भोलि दक्षिण भेगको एक अस्पताल अधिग्रहण गर्ने तयारी गरिएको छ ।
अमेरिकामा थप ५ सय ७६ जनामा संक्रमण देखिएपछि संक्रमितको संख्या १४ हजार ३ सय ६५ पुगेको छ भने २ सय १७ जनाको मृत्यु भइसकेको छ । विश्वभर कम्तिमा १० हजार मानिसको मृत्यु भएको छ भने २ लाख ४४ हजार ५ सय मानिसमा संक्रमणको पुष्टि भएको छ ।
एजेन्सी
तपाईँको अभिमत