अस्पतालमा संक्रमण : दुई सुत्केरीको मिर्गौला फेल
काउन्सिल भन्छ निवेदन परेको छैन
काठमाडौं, १५ फागुन । जोरपाटी अत्तरखेलस्थित नेपाल मेडिकल कलेजको शिक्षण अस्पतालमा सुत्केरी गराइएका तीन जनामा संक्रमण भएपछि मिर्गौला फेल भएको छ । फागुन ४ र ५ गते शल्यक्रिया गरि सुत्केरी गराइएका दुई जनाको अवस्था गम्भीर भएपछि नेपाल मेडिसिटी अस्पताल ल्याइएको थियो ।
मेडिसिटी अस्पतालमा दुबै जनालाई आइसीयुमा राखेर उपचार गरिएको र अहिले उनीहरुको अवस्था खतरामुक्त रहेको स्रोतले जानकारी दिएको छ । दुबैलाई डाइलाइसिस उपचार सुरु गरिसकेको छ । उनीहरुको आवश्यक परीक्षण गरिएको र थप रिपोर्ट आउन बाँकी रहेको अस्पताल स्रोतले जानकारी दिएको छ ।
मेडिकल कलेजका अध्यक्ष डा.भोला रिजालले सलाइन र औषधिमा आएको समस्याका कारण सुत्केरीमा संक्रमण भएको देखिएको बताउनुभयो । उहाँले पछिल्लो समय सुत्केरीमा संक्रमणको घटना बढ्दै गएकाले संक्रमणको कारणको अनुसन्धान हुनुपर्ने बताउनुभयो । उहाँले नीतिगत रुपमा नै समस्या हुनुका साथै यस्ता घटना अन्य अस्पतालमा पनि बढिरहेकाले अनुसन्धान गर्न आग्रह गर्नुभयो ।
स्लाइन, औषधिबाट संक्रमण भए नभएको पत्ता लगाउन औषधि व्यवस्था विभागमा नमुना पठाइएको र रिपोर्ट आउन बाकी छ । नेपाल मेडिकल काउन्सिलका रजिष्टार डा.कृष्ण अधिकारीले अनुगमनका क्रममा बेहोस पारि सुत्केरी गराउँदा तीन जनामा गम्भीर समस्या देखिएकाले शल्यक्रियाका क्रममा प्रयोग भएका स्लाइन, औषधि र औजार तथा अन्य सामग्रीका बारेमा अनुसन्धान गर्न जाँच कमिटी बनाइएको बताउनुभयो । उहाँले विरामीका तर्फबाट काउन्सिलमा अहिलेसम्म निवेदन नआएको पनि बताउनुभयो ।
उहाँले रिपोर्ट आएपछि उपचारका क्रममा डाक्टरको लापरबाही हो या औषधिमा देखिएको समस्या हो अथवा सुत्केरी पछिको हेरचाहमा गढबढी हो भन्ने कुराको एकिन हुने बताउनुभयो ।
यसअघि वीरगञ्जको नेसनल अस्पतालमा पनि शल्यकक्षमा यही किसिमको संक्रमण देखिएको थियो । पछिल्लो समय अस्पतालमा सुत्केरीहरुमा संक्रमण देखिएको छ ।
तपाईँको अभिमत