ब्रेकिङ न्यूज : स्वास्थ्यमन्त्री खरिपाटी क्वारेन्टाइन निरीक्षणमा : उद्दार गरिएका विद्यार्थीलाई सम्वोधन
सरकार सधैं नागरिकको साथमा रहेको स्पष्टाेक्ति
भक्तपुर, ६ फागुन । स्वास्थ्यमन्त्री भानुभक्त ढकाल भक्तपुरस्थित खरिपाटी क्वारेन्टाइन निरीक्षण गर्नुभएकाे छ ।
क्वारेन्टाइन व्यवस्थापनका सम्बन्धमा स्वास्थ्यमन्त्री ढकालले प्रमुख जिल्ला अधिकारी हुमकला पाण्डे सहित सुरक्षाकर्मीसँग ब्रिफिङ लिनुभयाे । क्वारेन्टाइन व्यवस्थापनमा सुरक्षाकर्मी, स्वास्थ्यकर्मी, सरसफाइ कर्मचारी गरि २ सय ५० जनाको टोली अहोरात्र खटिरहेकाे छ ।
चीनबाट उद्दार गरि ल्याइएको तेस्रो दिन मन्त्री ढकाल क्वारेन्टाइन निरीक्षणमा जानुभएको हो । कन्ट्रोल रुमबाट सम्बोधन गर्दै उद्दार गरिएका नेपालीलाई उहाँले सरकार आफ्ना नागरिकप्रति सचेत र जिम्मेवार रहेको बताउँदै सरकार सधै नागरिकको साथमा रहेको बताउनुभयो ।
स्वास्थ्यमन्त्री ढकालले क्वारेन्टाइनमा केही समस्या वा अप्ठेरो परेमा व्यवस्थापनमा जुटेकाे टोलीलाई तुरुन्तै जानकारी गराउन आग्रह गर्नुभयो ।
यसैविच चीनबाट उद्दार गरिएका नेपाली विद्यार्थी क्वारेन्टाइनमा राखेपछि असन्तुष्टि जनाउन थालेपछि भक्तपुरका प्रमुख जिल्ला अधिकारी हुमकला पाण्डे सचेतनाका लागि आफै स्थानियको घरदैलो पुग्नुभएको छ ।
प्रमुख जिल्ला अधिकारी पाण्डेले फागुन ५ गते हेल्थपाटी डटकमसंग क्वारेन्टाइन र उद्दार गरिएका नेपालीको अवस्थाका बारेमा आफुहरु जानकारी गराउदै हिड्ने बताउनुभएको थियो ।
क्वारेन्टाइनमा चीनबाट बिरामी विद्यार्थी ल्याएर राखेको र महामारी भित्र्याएको जसरी भ्रम फैलिएपछि उहाँ सुरक्षाकर्मीका साथ घरदैलो अभियानमा जुट्नुभएको हो ।
तपाईँको अभिमत