अध्ययनबाट पत्ता लाग्यो–'मास्क लगाएर व्यायाम गर्दा, खेल खेल्दा शरीरको तापक्रम बढ्दैन'
कोरोना महामारीका कारण विश्वभर नै अहिले मास्क लगाएर हिड्नु अनिवार्यजस्तै बनेको छ । कोरोना भाइरस संक्रमणको जोखिमका कारण मास्कबिना बाहिर निस्कनै हुँदैन भन्ने अवधारणाको विकास हुँदै गएको देखिन्छ । मान्छेमा एक्लै सडक या चौरमा हिड्दा पनि मास्क लगाएरै हिड्ने बानीको विकास भइरहेको छ ।
कोरोना संक्रमणको जोखिम तथा नयाँ नयाँ भेरियन्टसहितको महामारी आउने जोखिम अहिले पनि उत्तिकै छ । यस कारण मास्क त्याग्ने अनुमति कतै मिलेको छैन ।
मास्कले हाम्रै गतिविधि तथा क्रियाकलापमा प्रभाव पारिरहेको हुन्छ ।
मर्निङ वाकमा गर्दा वा शरीरिक कसरत गरिरहँदा मास्क लगाउने कि नलगाउने भन्ने विषयमा चर्चा हुनेगर्छ । मुटुको धड्कन बढ्ने, श्वास फेर्न गाह्रो हुने र शरीरको तापक्रम छिट्टै्र बढ्ने भएकाले शारीरिक कसरत गर्दा मास्क लगाउन सम्भव नभएको तर्क पनि हुँदै आएको छ ।
यसरी मास्क लगाएर गरिएको व्यायामले शरीरमा तापक्रम नबढाउने र मुटको धड्कन नबढ्ने एक अध्ययनले देखाएको छ । अमेरिकामा गरिएको एक अध्ययनले यस्तो निष्कर्ष निकालेको हो । कनेक्टिकट विश्वविद्यालयका शोधकर्ताले यसबारे गरेको अध्ययनको रिपोर्ट स्पोर्टस् हेल्थमा प्रकाशित गरिएको छ ।
अध्ययनकर्ताले ४ प्रकारका मास्कलाई अध्ययनमा समेटेको थियो । यसमा सर्जिकल मास्क, एन ९५ मास्क, मुखदेखि गर्दनसहित ढाक्ने गैटर मास्क र स्पोर्टर्स मास्क लगाउनेमा अध्ययन गरिएको थियो । यी कुनैपनि मास्क लगाउनेहरुमा बिना मास्क कसरत गर्नेकोमा भन्दा धेरै शरीरको तापक्रम बढेको देखिएन । साथै मुटुको धड्कन पनि बढेको देखिएन ।
अध्ययनमा सहभागीहरुले ३२ डिग्री सेल्सियस तामक्रम भएको वातावरणमा एक घण्टासम्म हिँड्ने र जगिङ गर्न गरेका थिए । उनीहरुको मास्क बाहिर र भित्रको आद्रता र तापक्रम मापन गरिएको थियो ।
यसरी अध्ययन गर्दा स्पोर्टस मास्क र गैटर मास्क प्रयोगकर्तामा मास्कभित्र आद्रता धेरै देखियो । श्वासबाट निस्किएको वाफ र पसिनाका कारण ।
अध्ययनमा सहभागीहरुले कसरत मास्क लगाएर गर्दा श्वास फेर्न गाह्रो भएको बताए तर श्वास फेर्ने केही कठिन हुनुले मुटुको गति र शरीरको तापक्रममा कुनै सम्बन्ध नभएको अध्ययन कर्ताहरुको दावी छ ।
उनीहरुले अध्ययनको निष्कर्ष यो निकालेका छन् कि मास्क लगाएर शारीरिक व्यायाम गर्न तथा खेलकुलमा सहभागी हुन सम्भव छ ।
अध्ययनको यो निष्कर्षले खेलाडीहरुलाई मास्क लगाएर कोरोना संक्रमणबाट सुरक्षित पनि हुने र खेल तथा व्यायामलाई निरन्तता दिन सहज हुने अपेक्षा राखेको छ ।
यो समग्री new18.com बाट लिइएको हो ।
तपाईँको अभिमत